Wasiirka Wasaaradda Deegaanka iyo Isbeddalka Cimilada JFS, Sareeye Guud Mudane Bashiir Maxamed Jaamac, ayaa maanta kulan muhiim ah la yeeshay Agaasimaha Xarunta La-qabsiga Isbeddalka Cimilada iyo Ilaalinta Deegaanka ee Urur Gobaleedka IGAD, Danjire Jamaal Maxamed Xasan, oo ka dhacay magaalada Muqdisho.
Kulanka ayaa diiradda lagu saaray xoojinta wada-shaqeynta Dowladda Federaalka Soomaaliya iyo IGAD ee ka hortagga iyo la-qabsiga isbeddalka cimilada, iyo ilaalinta deegaanka. Agaasimaha Xarunta IGAD ayaa Wasiirka siiyay warbixin ku saabsan hawlaha baaxadda leh ee la qabto ee ku saabsan isbeddalka cimilada, iyo istaraatijiyadda la-qabsiga ee 2023-2030, isagoo ballan-qaaday in Soomaaliya ay kaalin muhiim ah ka qaadan doonto.
Wasiir Bashiir Maxamed Jaamac ayaa sheegay in Wasaaraddu ay si dhow ula shaqeyn doonto IGAD si loo dardar-geliyo howlahaan, iyadoo la tayeeyo maareynta deegaanka iyo taageerada bulshooyinka saameysay fatahaadaha, abaaraha, iyo masiibooyinka dabiiciga ah.
Sidoo kale, Wasiirka ayaa kulanka ku wehelinayey Agaasimaha Guud ee Wasaaradda iyo khuburo kale, waxaana la isku afgartay in si wadajir ah loo hormariyo howlaha muhiimka ah ee labada dhinac u wada shaqeynayaan.
