Tartan cilmiyeedka bisha Ramadaan oo galay sanadkii Shan iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 24–aad ee wareegga Labaad kulankiisa 8-aad ku tartamay Degmooyinka Bardaale iyo Warsheekh oo ka kala tirsan Gobollada Baay iyo Shabeelaha Dhexe. waxaana barnaamijka si wadajir ah u taaba-gelineya Bankiga IBS iyo Maamulka Gobolka Banaadir.
Tartameyaasha labada degmoo ee Bardaale iyo Warsheekh ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Bardaale
Tartameyaasha Degmada Bardaale ee Gobolka Baay waxaa la weydiiyey todobo Su’aal, todobadii su’aal ee la weydiiyay waxa ay si sax ah uga jawaabeen Afar su’aal, halka ay iska qaldeen Saddex su’aal, Waxa ay ka faa’iideysteen Labo su’aal oo ay iska qaldeen dhigooda Warsheekh, sidaa darteed wadarta guud ee dhibcaha tartameyaasha Degmada Bardaale ay heleen waxay noqotay Labo iyo Toban (12) dhibcood.
Warsheekh
Tartamayaasha Degmada Warsheekh ee Gobolka Shabeelaha Dhexe waxaa dhankooda la weydiiyay todobo su’aal, waxa ay si sax ah uga jawaabeen Shan su’aal, halka ay iska qaldeen Labo su’aal, Waxa ay ka faa’iideysteen Hal su’aal oo soo hareermartay dhigooda Bardaale, sidaa darteed wadarta guud ee dhibcaha ay heleen tartameyaasha Degmada Warsheekh waxay noqotay Labo iyo Toban (12) dhibcood.
Sida sharciga tartanka qabo marka labo degmo ay isku dhibco noqdaan waxaa lagu daraa su’aalo dheerri ah si loo kala saaro degmooyinka tartamaya.
Su’aalihii dheeriga ahaa ee lagu daray waxa ay ku soo idlaatay Tartamayaasha Warsheekh oo helay 14 Dhibcood, halka Bardaale ay la yimadeen 16 dhibcood, sidaas ayayna ku soo idlaatay
Hadaba kulankii 24-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga Saddexaad u soo gudbay tartamayaasha Degmada Bardaale ee Gobolka Baay, ayadoo gebagebadii ay labada tartame isugu hambalyeeyeen guushaasi.
Habeen dambe haddii uu Alle idmo oo ah habeenka 25-aad ee tartanka, waxaa ku loolami doonaan Degmooyinka Marka iyo Dhahar oo ka kala tirsan Gobollada Shabeelaha Hoose iyo Sanaag. .
