Magaalada Eldoret oo ah magaalo ku dhacda Gobolka Rift Valley, hoostimaadana Gobolka Uasin Gishu ee dalka Kenya ayaa waxaa ku nool Jaaliyad balaaran oo Soomaaliyeed.
Magaaladan oo ah magaalada shanaad ee ugu weyn dalka Kenya ayaa waxa ganacsigooda inta badan ku tiirsan yahay ganacasiga dadka Soomaalida.
Magaaladan oo ah magaalada uu ka soo jeedo Madaxweynaha dalka Kenya ayaa Ganacsatada Soomaaliyeed waxa ay shaqaaleysiiyeen kumanaan kun oo dadka ku nool magaalada Eldoret iyo nawaaxigeeda.
Danjiraha Soomaaliya iyo xubno ka tirsan diblomaasiyiinta Safaraadda Soomaaliya ayaa booqasho isugu jirta xogwareysi iyo dhiigalin ugu tagay guud ahaan dadka Soomaaliyeed, gaar ahaan Ganacsatada Soomaaloyeed ee ku dhaqan magaalada Eldoret.
Danjire Jabril Ibrahim Cabdulle ayaa booqasho socod ah ku maray suuga weyn ee loo yaqaano, Islii-Yareey. Suaqaan ayaa ah suuqa ugu weyn oo ay dadka Eldoret ka dukaameystaan.
Danjiraha ayaa sidoo kale waxa uu soo booqday, xarumaha waaweyn ee ganacsiga ee ku yaalo Magaalada. Dadka Soomaaliyeed ayaa waxa ay ka dhoofiyaan magaalada Eldoret shidaalka kaas oo la geeyo dalalka Suudaan, South-Sudan, Rwanda iyo dalka DRC-Congo. Waxa kaloo ay dhoofiyaan badeecooyinka noocyadooda oo kale.
Dadka Soomaaliyeed ayaa sidoo kale waxa ay ku dhaqdaan degaanka Eldoret xoolaha, sida Geela, Ariga iyo Lo’da. Waxa kaloo ay leeyiihiin beero waaweyn oo soo saara tabaca Beeraha.
Gagagabadij, Habeenkii xalay ayaa xaflad isugu jirtay; Xog-wareysi, kala warqaadasho iyo soo dhaweeyn loo qabtay Danjiraha iyo wafdigii la socday.
Danjiraha ayaa ka warbixiyay horumarka balaaran oo ay sameeysay Dowladda Federaalka ee Soomaaliya, xiriirka u dhaxeeya Kenya iyo Soomaaliya oo marayo halkii ugu wanaagsanaa iyo dadaallada Safaraadda Soomaaliya ku garab taagan tahay dadka Soomaaliyeed ee ku dhaqan dalka Kenya.
Madaxda iyo hogaanka dadka Soomaalida ee ku dhaqan Magaalada Eldoret ayaa dhankooda uga mahadceliyay Safiirka Soomaaliya ee dalka Kenya Mudane Jabril Ibrahim Abdulle Safarka uu ku yimid Magaalada Eldoret, iyaga oo sheegay in ay tahay markii ugu horeysay oo uu mas’uul Soomaaliyeed soo booqdo Jaaliyadda. Taas oo aad u farxadgelisay dadka Soomaalida ee ku nool Magaalada Eldoret.
Madaxda Jaaliyadda ayaa u soo gudbiyay Safaaradda culaysyo ka heysta dhinaca safarka iyo ganacsigooda. Labada dhinac ayaana isla-gartay in la magacaabo gudi joogteeya xiriirka Jaaliyadda iyo Safaaradda.
Danjire Jabril ayaa uga mahadceliyay madaxda ugu sareysa Gobolka, gaar ahaan madaxda Magaalada Eldoret sida muga leh ay u soo dhaweyeen isaga iyo wafdigiisa
