Madaxweynaha dalka Faransiiska Emmanuel Macron ayaa ka dhawaajiyay, in dowladdiisa ay dhawaan aqoonsan doono dowladnimada Falastiin, taas oo uu horgayn doono fadhiga ugu soo horreeya ee Golaha Guud ee Qaramada Midoobay. War qoraal ah oo uu kusoo daabacay madaxweyne Macron bartiisa bulsho ee X, ayaa uu ku shaaciyay arrintan, isagoo sidoo kalena ku baaqay in la sameeyo xabbad joojin degd-deg ah.
“Baahida degdega ah ee maanta waa in dagaalka Gaza la soo afjaro oo dadka rayidka ah la badbaadiyo, nabad waa suurtagal, waxaan u baahannahay xabbad joojin degdeg ah, iyo in la sii daayo dhammaan la haystayaasha, iyo gargaar bini’aadannimo oo ballaaran oo la gaarsiiyo dadka Gaza”, ayaa uu yiri madaxweyne Macron.
Shirweynaha Golaha Guud ee Qaramada Midoobay ayaa ka dhacaya magaalada New York ee dalka Mareykanka bisha September ee sanadkan 2025, haddii uu ka dhabeeyo Macron hadalkiisan, waxa uu dalka Faransiisku noqon doonaa, dalkii ugu horreeyay ee ka tirsan dalalka ku bahoobay G7, ee aqoonsada dowladda Falastiin.
