RADIO MUQDISHO:-Taliyaha Ciidanka Dhulka, Sareeye Guuto Sahal Cabdullaahi Cumar ayaa Muqdisho ka sagootisay cutubyo ciidan oo ka tirsan kuwa Xoogga Dalka Soomaaliyeed, kuwaas oo loo diray furimaha dagaalka ee gobolka Shabeellada Hoose si ay uga qeyb qaataan howlgalada ka dhanka ah Khawaarijta.
Taliyaha Ciidanka Dhulka, Sareeye Guuto Sahal Cabdullaahi Cumar oo la hadlay ciidanka la sagootinayay, ayaa ku boorriyay inay muujiyaan geesinimo iyo feejignaan, isla markaana ay u diyaar garoobaan xoreynta deegaanada kooban ee ay ku dhuumaaleysanayaan Khawaarijta ee gobolkaasi.
Wuxuu sidoo kale carrabka ku adkeeyay Taliyuhu muhiimadda ay leedahay in ciidanku ilaaliyaan shacabka, kana shaqeeyaan sugidda amniga iyo xasilinta deegaanada la xoreynayo, si dib loogu soo celiyo nolosha xorriyadda ee ay xaqa u leeyihiin bulshadu.
