Guddoomiyaha Hay’adda Maareynta Musiibooyinka Soomaaliyeed (SoDMA), Mudane Maxamuud Macallin Cabdulle, ayaa maanta kulan la yeeshay Ku-simaha Taliyaha Ciidanka Xoogga Dalka Soomaaliyeed, ahna Taliyaha Ciidanka Cirka, Sarreeye Guuto Cabdirisaaq Maxamuud Xaaji (Qaloombi).
Kulanka oo ka dhacay Xarunta Ciidanka Cirka Soomaaliyeed ayaa looga hadlay xaaladda bani’aadannimo ee dalka iyo diyaar-garowga saameynta laga filayo Super El Niño, gaar ahaan fatahaadaha iyo xaaladaha kale ee ka dhalan kara roobabka la saadaalinayo.
Labada dhinac ayaa isku raacay in Ciidamada Qalabka Sida ay door muhiim ah ka qaataan dadaallada gurmadka iyo badbaadinta bulshada. Sidoo kale, waxaa la isla gartay in Ciidanka Cirku door ka qaato gaarsiinta gurmadka, xog-ururinta iyo qiimeynta xaaladaha dhulka, iyadoo la adeegsanayo diyaaradaha qumaatiga u kaca iyo kuwa aan duuliyaha lahayn.
Ugu dambeyn, Guddoomiyaha Hay’adda SoDMA, Mudane Maxamuud Macallin Cabdulle, ayaa bogaadiyay Ciidanka Cirka Soomaaliyeed, isagoo xusay muhiimadda ay leedahay xoojinta iskaashiga iyo diyaar-garowga hay’adaha dowladda, si si hufan looga hortago loogana jawaabo saameynta laga filayo Super El Niño, loona ilaaliyo badbaadada shacabka.
