Agaasimaha Guud ee Wasaaradda Waxbarashada iyo Tacliinta Sare ee Dowladda Hirshabeelle, Mudane Nuur Xasan Muuse (Jaake), ayaa maanta kormeer shaqo ku tagay Xarunta Machadka Tababarrada Hirshabeelle ee magaalada Beledweyne.
Agaasimaha ayaa halkaasi kula kulmay Macallimiinta Qaranka ee sanadkii 2024 ku soo baxay qaadashada barnaamijka macallimiinta, kuwaas oo tababar uga socda xarunta, isla markaana ka howlgalaya Dowladda Hirshabeelle, gaar ahaan Gobolka Hiiraan.
Mudane Nuur Xasan Muuse ayaa macallimiinta ku booriyay inay si wanaagsan u gutaan waajibaadkooda shaqo, isaga oo uga mahadceliyay doorka muhiimka ah ee ay ka qaadanayaan barbaarinta iyo waxbaridda ubadka Soomaaliyeed.
Agaasimaha Guud ayaa sidoo kale ka dhageystay macallimiinta baahiyahooda guud, halka uu ka xog-wareystay habsami-u-socodka tababarka, waxyaabaha ay ka faa’iideysteen iyo caqabadaha jira.
Ugu dambeyn, Agaasimaha Guud ayaa sheegay in Wasaaradda Waxbarashada iyo Tacliinta Sare ay si dhow ula socon doonto xaaladda macallimiinta, isla markaana ay ka shaqeyn doonto sidii loo xoojin lahaa tayada iyo tayeynta macallimiinta ka howlgalaya Gobolka Hiiraan.
