Wasiirka Wasaaradda Tamarta iyo Kheyraadka Biyaha Galmudug, Cabdullaahi Maxamed Daahir Leedo, oo ay weheliyaan Wasiiru-dowlaha Wasaaradda Caafimaadka Galmudug, Daahir Faarax Fiidoow, ayaa kormeer shaqo ku tagay deegaanno iyo degmooyin ka tirsan Galmudug.
Mas’uuliyiinta ayaa booqday deegaannada Baxdo, Qeydaro, Baraag Ciise iyo Xero Dhagaxley, halkaas oo ay si dhow ugu kuurgaleen xaaladda nololeed ee bulshada iyo baahiyaha aasaasiga ah ee ka jira deegaannadaasi.
Ujeedka socdaalka ayaa ahaa in mas’uuliyiintu ay si toos ah u qiimeeyaan baahiyaha dhinacyada biyaha iyo caafimaadka, gaar ahaan xaaladda helitaanka biyaha iyo adeegyada caafimaad ee ay bulshada deegaanka u baahan yihiin.
Intii uu socday kormeerka, wafdigu waxay la kulmeen bulshada iyo dadka deegaanka, iyagoo ka dhageystay xaaladaha ay ku nool yihiin iyo caqabadaha ay kala kulmaan helitaanka adeegyada muhiimka ah.
Wasiirka Tamarta iyo Kheyraadka Biyaha Galmudug Cabdullaahi Maxamed Daahir Leedo ayaa sheegay in kormeerku qeyb ka yahay dadaallada Wasaaradda ee lagu ogaanayo baahiyaha dhabta ah ee bulshada, gaar ahaan meelaha ay ka jiraan baahiyaha biyaha.
Sidoo kale, Wasiiru-dowlaha Wasaaradda Caafimaadka Galmudug Daahir Faarax Fiidoow ayaa qiimeyn ku sameeyay baahiyaha caafimaad ee bulshada, iyadoo la eegayo sidii loo xoojin lahaa adeegyada caafimaad ee gaara deegaannada miyiga iyo kuwa ka fog xarumaha waaweyn.
Socdaalkan ayaa qeyb ka noqonaya dadaallada maamulka Galmudug ee lagu xoojinayo adeegyada aasaasiga ah iyo in baahiyaha bulshada laga ogaado goobaha ay ka jiraan, si loo helo qorshe wax looga qabanayo caqabadaha ka jira biyaha iyo caafimaadka
