Wasiirka Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya Mudane Cabdifitaax Qaasim Maxamuud ayaa khudbad ka jeediyay Madasha 7-aad ee Caalamiga ah ee Wadahadalka Dhaqamada oo uu maanta si rasmi ah u furay Madaxweynaha dalka Azerbaijan Mudane Ilham Aliyev.
Madashan oo halku-dhiggeedu yahay โWadahadal loogu talagalay Mustaqbal la wadaago, dhisidda Buundooyin isku xira aduun kala qeybsanโ ayaa diiradda lagu saaraya xoojinta wada-hadalka dhaqamada, nabadda, isfahamka iyo iskaashiga caalamiga ah.
Related posts
Khudbadda Wasiirka ayaa ku saabsanayd muhiimadda ilaalinta iyo horumarinta hiddaha iyo dhaqanka, xoojinta wada noolaanshaha bulshooyinka iyo doorka ay tiknoolojiyadda casriga ah iyo garaadka macmalka ah (AI) ka qaadan karaan kobcinta isfahamka dhaqamada kala duwan.
Wasiirku wuxuu sidoo kale adkeeyay baahida loo qabo ilaalinta afka, suugaanta, fanka iyo taariikhda Soomaaliya, iyo adeegsiga tiknoolojiyadda casriga ah si loo diiwaangeliyo, loo kaydiyo loona gudbiyo dhaxalka dhaqameed ee Soomaaliyeed, si jiilasha soo socda ay uga faaโiideystaan.
Mudane wasiir Cabdifitaax Qaasim ayaa ku baaqay iskaashi caalami ah oo lagu horumarinayo adeegsiga afafka kala duwan ee tiknoolojiyadda, kor loogu qaadayo xirfadaha dhallinyarada, laguna xaqiijinayo in horumarka dijitaalka ahi dhowro aqoonsiga, xuquuqda iyo qiyamka dhaqamada kala duwan.
Wuxuu intaas ku daray in tiknoolojiyadda loo adeegsado isku xirka dhaqamada, ballaarinta fursadaha isfahamka iyo xoojinta nabadda, si loo dhiso mustaqbal ay bulshooyinku ku kala duwanaan karaan, isla markaana ugu wada noolaan karaan is-ixtiraam iyo iskaashi.
Ugu dambeyn, Wasiirka ayaa soo jeediyay in talooyinka iyo ballanqaadyada ka soo baxa madasha loo beddelo barnaamijyo wadajir ah oo la fulin karo, lehna natiijooyin la cabbiri karo, kuwaas oo taageeraya ilaalinta dhaxalka dhaqameed, horumarinta afafka, awoodsiinta dhallinyarada iyo xaqiijinta ka-qaybgal loo siman yahay oo ay helaan dhammaan dalalka iyo bulshooyinka.
Madasha waxaa wasiirka kala qeyb galay Danjiraha Jamhuuriyadda Federaalka Soomaaliya u fadhiya dalka Azerbaijan Mudane Cabdinuur Daahir Fiidoow oo ka qeyb qaadanaya dadaallada lagu xoojinayo xiriirka diblomaasiyadeed iyo iskaashiga Soomaaliya iyo Azerbaijan.
