Wararka ka imaanaya gobolka Baay ayaa sheegaya in ciidanka dowladda Soomaaliya oo ku sugan degmada Ufurow ee gobolkaasi ay saaka weerar qorsheysan ku qaadeen tuulada Buulo-Caddey oo fadhiisan u aheyd maleeshiyaadka kooxda Al-shabab sida uu sheegay guddoomiyaha degmadaasi.
Xasan Aadan Duur (Ilka case) oo ah guddoomiyaha degmada Ufurow ayaa sheegay in weerarka ay ku dileen afar horjooge oo tairsan Al-shabaab oo uu ku jiro guddoomiyihii kooxdaasi u qaabilsanaa Tuulada la weeraray.
Guddoomiyaha ayaa sidoo kale sheegay in horjoogiyaasha maanta ay dileen uu kamid yahay nin magaciisa lagu sheegay Sheekh Xasan oo maleeshiyaadka ku qaabilsanaa faafinta afkaarta kooxda, iyadoo guddoomiyuhu xaqiijiyay in hub badan ay ka qabsadeen maleeshiyaadka Al-shabaab.
Xasan Aadan Duur guddoomiyaha degmada Ufurow ee gobolka Baay ayaa sidoo kale tilmaamay in howlgalkan uu socon doono ilaa maleeshiyaadka al-shabaab laga saaro deegaanada hoos yimaada degmadaasi.
Weerarkan saaka ay ciidanka dowladda Soomaaliya ay ku ekeeyeen saldhiga Al-shabaab ay ku lahaayeen gobolka Baay ayaa noqonaya kii ugu horeeyay oo ciidanka ay fuliyaan tan iyo markii maleeshiyaadka laga xoreeyay degmada Ufurow.
