Saraakiil ka tirsan ciidamada AMISOM ayaa howlo kormeer ah u tegay deegaanka Ceel Baraf, kuwaasi oo ujeedka socdaalkooda ay la xiriirtay u kuurgelidda xaaladda magaalada, maadaama dadka intooda badan ay magaaladaasi ka barakaceen.
saraakiisha AMISOM ayaa ka warbixiyay biyo la’aanta ka jirta magaalada iyo guud ahaan xaaladda amniga, iyagoo xusay in dadka deegaanka ay u baahanyihiin inay helaan adeegyada guud ee bulshada, maadaama aysan halkaasi ka jirin adeegyadii caafimaadka, waxbarashada iyo kuwa kale ee aas aasiga u ah nolosha beni’aadamka.
Nabadoon Muuse Sharaawe iyo Maxamuud Cali Garabeey oo ka mid ah dadka deegaanka ayaa xusay in maleeshiyada Al-Shabaab ay dhibaato ku hayaan dadka deegaanka, kuwaasi oo inta badan Shabaabka kala kulma caga jugleen iyo dhibaatooyin kale oo loo geysto, waxaana ay codsadeen in laga dulqaado dhibaatada ay argagixisada Al-Shabaab ku hayaan shacabka magaalada Ceel Baraf ee ka tirsan gobolka Shabeelaha Dhexe.
Afhayeenka ciidamada AMISOM Joe kibet oo u waramay Warbaahinta Qaranka ayaa tilmaamay in socdaalka ay ku tegeen magaalada ay qeyb ka ahayd sidii ay ugu kuur geli lahaayeen xaalada magaalada, isagoo xusay in koox wariyeyaal ah oo ay ka wadeen caasimadda ay ujeedku ahayd sidii loo tebin lahaa xaqiiqda ka jirta magaalada Ceel Baraf.
“Arrinta murada leh ee halkan ka jirta waxa ay tahay, in badanaa dadkii magaaladan ku noolaa ay isaga baracaceen sababo la xiriira biyo la’aanta ka jirta magaalada, waxayna dadka nagu soo wargelyeen in saddex todobaad ka hor maleeshiyada Al-Shabaab ay bur buriyeen ceelkii ay dadka biyaha ka cabi jireen, taas ayaana keentay in dadku ay magaalada ka baracaan oo ay raadsadaan meelo kale oo ay biyaha ka heli karaan, dadka waxay kaloo u baahanyihiin inay helaan adeegyada guud ee bulshada sida caafimaad, waxbarasho iyo wixi kale ee la hal maala”.
