Afhayeenka Wasaaradda Gaashaandhigga XFS Sheekh Abuukar Macalin ayaa ka warbixinyay howlgalladii ugu dambeeyay ee Ciidamada Qaranka iyo geesiyaasha Xaq u dirirka deegaanka ay ka sameeyeen Gobollada Galgaduud,iyo Jubbadda Hoose, kuwaas oo lagu khaarajiyay horjoogayaal in muddo ah lagu dabajiray iyo maleeshiyaadkii la socday.
Deegaanka u dhexeeya Qod-Qod iyo Camaara, oo lagu magacaabo Xiinguduud,ayaa waxaa uu sheegay afhayeenku in lagu dilay 11 maleeshiyaadka Khawaarijta ka tirsanaa, intii uu socday hawlgalkan.
Ciidamada sida gaarka ah u tababaran ee Kumaandooska Danab ee Xoogga Dalka Soomaaliyeed, ayaa sidoo kale waxa ay hawlgal qorsheysan ka sameeyeen deegaannada Miindo iyo Harbolle ee gobolka Jubbada Hoose, waxaana ay halkaas ku dileen dhagar-qabeyaal uu kamid ahaa horjooge lagu magacaabo Ibraahim Takeey,kaas oo khawaarijta u qaabilsanaa afduubka iyo sidii loo dhibaateyn lahaa shacabka Soomaaliyeed.
Gobolkada Shabeellaha Dhexe iyo Shabeellaha Hoose, ayaa si la mid ah waxaa ka dhacay hawlgallo kala duwan, kuwaas oo iyaguna lagu khaarajiyay tiro maleeshiyaadka Khawaarijta ka tirsanaa, sidoo kalena looga furtay hub iyo saanad.
Afhayeenka Wasaaradda Gaashaandhigga XFS Sheekh Abuukar Macalin, ayaa ciidamada ugu hambalyeeyay guulaha ay gaadheen, sidoo kalena waxa uu ku bogaadiyay, xoojinta dagaalka ka dhanka ah Khawaarijta, si guud ahaan dalkeenna looga nadiifiyo hadhaadiga Khawaarijta.
