Wasiir Ku-xigeenka Wasaaradda Waxbarashada, Hiddaha iyo Tacliinta Sare ee XFS, Xildhibaan Cabdirashiid Maxamed Ducaal, ayaa si rasmi ah uga dhagax-dhigay magaalada Baardheere laba dugsi oo casri ah, isagoo ay wehelinayeen masuuliyiin ka kala socday Wasaaradda Federaalka iyo Jubbaland.
Dugsiyadan cusub ayaa qeyb ka ah mashruuca “Somalia Education for Human Capital Development”, oo uu maalgelinayo Bangiga Adduunka, lana doonayo in lagu dhiso in ka badan 70 dugsi guud ahaan dalka.
Mas’uuliyiinta degmada Baardheere iyo saraakiisha ammaanka ayaa si buuxda u taageeray mashruucan, iyagoo muujiyay diyaar garowga ku aaddan hirgelintiisa.
Mashruucani waxa uu astaan u yahay dadaalka joogtada ah ee lagu xoojinayo tayada waxbarashada iyo ballaarinta fursadaha waxbarasho ee caruurta Soomaaliyeed, gaar ahaan meelaha baahida weyn jirto.
