Afhayeenka Wasaaradda amniga gudaha ee Xukuumadda Soomaaliya ayaa shaaciyay in maalmahan ay ciidamada sameeyeen howlgallo lagu baacsanayo maleeshiyada Al-Shabaab, waxaana uu intaa ku daray in dhawaan shacabka Soomaaliyeed ay dhagahooda ku maqli donaan waxyaabo ay ku farxaan.
Mudane Cabdikaamil Macalin Shukri Afhayeenka Wasaaradda Amniga gudaha oo la hadlay Radio Muqdisho ayaa sheegay in laamaha amniga ay joogteen doonaan howlgallada ka dhanka ah Al-Shabaab, si guud ahaan dalka looga ciribtiro.
Afhayeenka Wasaaradda amniga gudaha ayaa xusay in maleeshiyaadka Al-Shabaab ay maalmahaan bilabeen weeraro gaadma ah oo ay ku qaadayaan fariimaha ciidamada, waxaana uu intaa ku daray in dhawaan la sameyn doono qorshe Shabaab dalka oo dhan looga cirib tiri doono.
Mudane Cabdikaamil Macalin Shukri ayaa ugu baaqay shacabka Soomaaliyeed inay xoojiyan la shaqeynta laamaha amniga, si looga hortago dhagarta ay maleegayaan argagixisada Al-Shabaab.
