Agaasimihii hore ee Radio Muqdisho Mudane Cabdirixiin Ciise Caddow ayaa maanta xilka idaacadda ku wareejiyay agaasimaha cusub ee loo soo magacaabay Mudane Axmed Faarax Gaatamow.
Munaasabad uu xilka kula wareegayay agaasimaha cusub ee Radio Muqdisho oo lagu qabtay xarunta idaacadda, uuna ka qeyb galay Agaasimaha Guud ee Wasaaradda Warfaafinta, ayaa hadal kooban uu xafladda ka jeediyay Agaasime Cabdirixin Ciise waxa uu ku sheegay in muddadii uu agaasime ka ahaa Radio Muqdisho ay wax badan u qabsoomeen, ayna jiraaan caqabado horyimid, isagoo mahadcelin u jeediyay howlawadeenadii la soo shaqeysay, isla markaana kula dar daarmay inay si hufan ula shaqeeyaan Agaasimaha cusub.
Mudane Axmed Faarax Gaatamow oo la wareegay xilka Agaasimaha Radio Muqdisho ayaa sheegay in uu ku faraxsanahay xilka maanta loo dhiibay, isla markaana uu horey u sii dhaqaajin doono howlihii ay idaacada bulshada u haysay.
Dhawaan wareegto ka soo baxday xafiiska Wasiirka Warfaafinta, dhaqanka iyo dalxiiska ee Xukuumadda Soomaaliya Mudane Maxamed Cabdi Xayir Maareeye ayaa isku shaandheyn lagu sameeyay qaar ka mid ah agasimeyaasha waaxyaha ee Wasaaradda, kuwaasi oo kala ah Agaasime Cabdirixiin Ciise Caddow oo loo magacaabay Agaasimaha Qorsheynta iyo xiriirka caalamiga ah ee Wasaaradda, Agaasime Axmed Faarax Gaatamow oo loo magacaabay Agaasimaha Radio Muqdisho, Agaasime Cabdiraxmaan Yuusuf Sheekh Al-Cadaala oo loo magacaabay Agaasimaha Wakaaladda Wararka Qaranka Soomaaliyeed SONNA iyo Agaasime Cabdinaasir Xuseen oo loo magacaabay Agaasimaha Telefishinka Qaranka.
Sawir Qaade:- Farxaan Suleymaan Daahir
