Munaasabad uu xilka kula wareegayey Agaasimaha cusub ee maamulka iyo maaliyadda ee Wasaaradda Caafimaadka Soomaaliya ayaa lagu qabtay Muqdisho
Wasiirka Caafimaadka iyo Daryeelka Bulshada Soomaaliya, Agaasime waaxeedyada Wasaaradda, masuuliyiin ka kala socotay hanti dhowrka Qaranka, Wasaaradda Maaliyadda iyo marti sharaf kale ayaa ka qeyb galay munaasabadan oo uu xilka kula wareegayey Agaasimaha cusub ee maamulka iyo maaliyadda ee Wasaaradda Caafimaadka Mudane Cabdullahi Salaad Xuseen, kaas oo dhawaan ku soo baxay tartan Daah-furan oo ay ka qeyb galeen Boqol Konton iyo Afar Qof.
Related posts
Ugu Horeyn Hanad Xasan oo kamida La-taliyayaasha Sare ee Wasaaradda Caafimaadka Soomaaliya ayaa sheegay in booska uu kusoo baxay Agaaasimaha cusub ee maaliyadda Cabdullahi Salaad Xuseen uu ahaa mid uu tartan adag u galay, isla markaana ugu dambeyn uu ku guuleystay kadib qiimeyn dhinacyo badan oo ay sameeyeen gudigga qaadayey imtixaanka oo ka kobnaa qubarro kala duwan.
Agaasimii hore ee Maamulka iyo Maaliyadda Maxamed Cabduqadir Xersi , Ayaa si qoto dheer uga hadlay waxyaabihii u qabsoomay mudadii uu xilka hayey, wuxuuna Agaasimaha cusub u rajeeyay inuu howsha halkeeda kasii wado oo uu laba jibaaro.
Agaasime ku-xigeenka Miisaaniyadda ee Wasaaradda Maaliyadda Cabdikariin Maxamed Xuseen Laari iyo Agaasimaha Maaliyadda ee Hanti dhowrka Qaranka Cumar Nuur ayaa bogaadiyay shaqada hufan ee ka socota Wasaaradda Caafimaadka Soomaaliya oo ay hormuud u tahay Wasiir Fowziya Abiikar Nuur, waxayna xuseen In ay marqaati ka yihiin shaqadii hufneyd ee uu qabtay Agaasimiha xilka wareejiyay ee Maxamed Cabduqaadir Xersi iyagoo Agaasimaha cusubna u rajeeyay shaqo wacan.
Wasiirka Caafimaadka iyo Daryeelka Bulshada Soomaaliya Dr Fowziya Abiikar Nuur oo munaasabadda soo xirtay ayaa Agaasimihii hore uga mahadcelisay shaqadii wanaagsaneyd ee uu qabtay, waxayna dhinaca kale Agaasimaha cusub ee Maamulka iyo Maaliyadda kula dardaarantay inuu si hufan u guto waajibaadka loo igmaday oo ay sheegtay inuu yahay mid dhib badan.
