Gaasimaha Guud ee Wasaaradda dhallinyarada iyo Cayaaraha Xukuumadda Federaalka Soomaaliya Mudane Cabdiraxiim Warsame Diiriye oo uu weheliyo Agaasimaha waaxda ciyaaraha Wasaaradda Saacid Maxamed Xasan, ayaa kulan la qaatay macalimiinta xulka qaranka 17 jirrada ee horyaalka Bariga Iyo Bartamaha Afrika.
Kulanka oo ay goobjoog ahaayeen macalin Nuur Maxamed Amiin iyo macalin Jamaal Xaashi Tuure waxaa kale oo weheliyay labo macalin oo xulka qaranka ka tirsan waxaana looga hadlayay sidii loogu diyaar garoobi lahaa tartanka 17 jirada ee qaaradda Afrika oo bisha April la qaban doono.Macalimiinta, ayaa agaasimaha guud uga war bixiyay meesha uu marayo diyaar garowga kooxda iyo tababarrada ay qaataan, waxayna muujiyeen inay rajada ay ka qabaan inay natiijo wax ku ool ah oo Shacabka Soomaaliyeed farxad gelisa kala soo noqon doonaan Aljeeriya.
Dhowaan ayay ahayd markii wasiirka Wasaaradda dhalinyarada iyo Ciyaaraha Xukuumadda Federaalka Soomaaliya Mudane Xil Maxamed Barre Maxamuud uu booqday garoomada ay tababarka ku qaataan xulka qaranka isagoo u kuur galay diyaar garowga ay ku jiraan.
