Agaasimaha guud ee Hay’adda Socdaalka iyo Jinsiyadda oo maalmahaan ku sugnaa UK ayaa kulan la qaatey Wasiirka Socdaalka dalka UK, waxaana laga wadahadley baasaboorka Soomaaliya iyo iskaashi dhinaca socdaalka ah oo dhex mara labada wadan.
Wasiirka socdaalka UK ayaa sheegey in ay si wadi doonaan isla markaana xoojin doonaan xariirka dhinaca socdaalka ee ka dhaxeeya Ingiriiska iyo Soomaaliya, lana xoojin doono hanaanka socda ee aqoonsiga loogu raadinayo baasaboorka Soomaaliya.
Agaasimaha guud iyo wifdiga uu hogaamanayey ayaa booqdey xarunta laga bixiyo baasaboorka UK iyo weliba xaruunta hubinta dukumentiyada UK. Sidoo kale agaasimaha ayaa la kulmey khubarada gacanta ku heysa baasaboorka Soomaaliya, isaga oo ka qaatey warbixin ku saabsan hanaanka aqoonsiga loogu raadinayo baasaboorka Soomaaliya.
Socdaalka Agaasimaha Guud ee Hay’adda Socdaalka iyo Jinsiyadda uu ku tegayo dalalka Yurub ayaa ah mid lagu xoojinayo xiriirka Soomaaliya ay la leedahay dalalka dibadda, si baasaboorka Soomaaliya uu u noqdo mid wadankasta oo Yurub ah lagu tegi karo.
