Agaasimaha Guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Guuleed Cabdijaliil ayaa ka qeybgaley Shir ay marti gelisay Dowladda Qatar kaas oo looga hadlayey daryeelka iyo Caafimaadka aas aasiga ah ee wadamada ku bahoobey iskaashiga Koonfureed.
Hindisaha Siyaasadda Caafimaadka Koonfurta ee Caalamiga ah ee Doxa ayaa looga hadley sidii loo horumarin lahaa madal iskaashi oo loogu talagalay waddamada Koonfurta Caalamka si ay wax uga qabtaan caqabadaha daryeelka iyo Caafimaad taasoo ka turjumeysa sida wadamada Koonfurta uga go’an tahay in bulshooyin koodu helaan xalal waara oo la taaban karo.
Golaha Bariga Dhexe ee Arrimaha Caalamiga ah (ME Council) iyo Bill and Melinda Gates Foundation, (BMGF) oo taageero ka helaya Wasaaradda Arrimaha Dibadda Qatar, ayaa daah-furtay hindisahan, iyadoo ay goob joog ka ahayd Wasiirka Caafimaadka Dowladda Qatar Dr. Hanan Mohamed Al Kuwari, Wasiiru-dowlaha Iskaashiga Caalamiga ee Wasaaradda Arrimaha Dibadda, Lolwah bint Rashid Al Khater, madaxa BMGF iyo marti sharaf kale oo dhowr ah.
Muddo labo maalmood ah, oo uu kulanka ka socdey Doxa ayaa lagu qeexay Istaraatiijiyadda guud ee hindisaha Caafimaadka aas aasiga ah iyada oo dhinaca kale laga ururiyey aaraahda dhinacyadii goobjooga ahaa sida wakiillo ka socday waddamada dhaqaalahoodu hooseeyo iyo kuwa dhexdhexaadka ah (LMICs), khubaro Caalami ah, iyo wakiillo ka socda daneeyayaasha Qatar ee muhiimka ah oo ay ku jiraan Wasaaradda Caafimaadka Dadweynaha, Wasaaradda Arrimaha Dibadda, Sanduuqa Qatar ee Horumarinta, Jaamacadda Qatar, iyo Jaamacadda Hamad Bin Khalifa.
Madasha waxaa lagu soo bandhigey dood-wadaag cinwaan looga dhigay ‘kor u qaadista Helitaanka Daryeelka Caafimaadka Aasaasiga ah ee Koonfurta Adduunka, Caqabadaha iyo Xalka sidii loo wajihi lahaa ayadoo la marayo hanaanka Istiraatiijiyadda loo dhanyahay ee wadamada isbaheysiga Koonfurta aduunka si loo xaqiijiyo bedqabka iyo daryeelka bulshooyinka dalalkaas taasoo sidoo kale qeyb wayn ka ah arragtida guud ee dalalka Koonfurta.
Agaasimaha Guud ee Wasaaradda Caafimaadka iyo daryeelka bulshada Xukuumadda Federaalka Soomaaliya Mudane Dr. Guuleed Cabdijaliil ayaa Khudbad uu kaga hadlayey xaaladda Caafimaadka Hooyadda iyo dhallaanka ee dalkeena ka jeediyey madasha waxa uuna muujiyey sida Soomaaliya ugu go’an tahay xal u hellida yareynta iyo xakameynta dhimashada sababta daryeel la’aanta ee Hooyadda iyo dhallaanka, isagoo sidoo kale is dultaagey isbedallada horumarineed ee ay garwadeenka ka tahay Wasaaradda Caafimaadka iyo daryeelka bulshada Xukuumadda Federaalka Soomaaliya ee ku aadan qeybta Hooyadda iyo dhallaanka.
Wasaaradda Caafimaadka iyo daryeelka Bulshada Xukuumadda Federaalka Soomaaliya waxaa ka go’an wax ka qabashada baahiyaha Caafimaad ee ka jira Dalka iyo sidii lagu horumarin lahaa Caafimaadka Soomaaliya si loogaaro yoolka horumarinta Caafimaadka Qaranka.
