Wasaaradda Gaadiidka iyo Duulista Hawada ee Soomaaliya ayaa waddo qorshe lagu diiwaan gelinayo gaadiidka, leysamada iyo diyaarinta mashruuc ku saabsan badqabka Nabad gelyada gaadiidka oo lagu hubinayo gawaarida jajabka ah.
Agaasimaha Guud ee Wasaaradda Gaadiidka iyo Duulista Hawada Soomaaliya mudane Cali Gacal Gaabow oo la hadlay Radio Muqdisho ayaa tilmaamay in qeybta gaadiidka dhulka ee Wasaaradda ay haatan meel gabo gabo ah u marayo diyaarinta qorsheyaal dhowr ah oo lagu hubinayo gaadiidka.
“Qorshaha ugu weyn hadda aan wadno waxa ay tahay inaan sameyno xarun lagu mideynayo, diiwaan gelinta iyo taargooyinka gaadiidka iyo helidda xogta gaadiidka, kaasi oo laga hirgelin doono dhamaan xarumaha dowlad goboleedyada qeybta ka ah dowladda Federaalka Soomaaliya”. Ayuu yiri Agaasime Gacal.
Agaasimaha Guud ee Wasaaradda Gaadiidka iyo Duulista Hawada Soomaaliya ayaa tilmaamay in bulshada inteeda badan marka ay raadinayaan warqadda ogolaanshiyaha wadista gaadiidka aysan ogoleen inay sharuucda si sax ah u maraan, isagoo intaa ku daray in Wasaaradda ay markasta adkeyneyso ku dhaqanka sharciga.
“Waxaan bulshada Soomaaliyeed ka codsaneynaa in qofkasta uu dhowro nidaamka iyo habraaca shaqo ee hay’adaha dowladda, wey jirta culeysyo badan oo iska jira, balse anaga waxaa naga go’an inaan si hufnaan ah ugu adeegno bulshada howlaha aan u hayno”. Ayuu yiri Mudane Cali Gacal Gaabow.
Mudane Cali Gacal Gaabow ayaa hoosta ka xariiqay in Wasaaraddu ay ku howlantahay horumarinta garoomada diyaaradaha dalka, tababarsiinta shaqaalaha ka shaqeynaya dhanka Amniga iyo helidda adeegyada looga baahanyahay garoomada diyaaradaha.
“Wasaaradda waxa ay qeyb ka tahay qorshaha Qaranka ee sagaalaad oo ah qorshe balaaran soconaya shan sano, sanadkiisa koowaad ayaan ku guda jirnaa, halkaasina waxaa noogu diyaarsan hal beegyo ay Wasaaradda ka duuleyso oo ku saleysan howlaha horyaalla”. Ayuu yiri Agaasimaha Guud ee Wasaaradda Gaadiidka iyo Duulista Hawada Soomaaliya mudane Cali Gacal Gaabow.
