Agaasimaha guud ee Hay’adda Socdaalka iyo Jinsiyadda Soomaaliya ayaa maanta soo xirey tababar uga socdey Muqdisho saraakiisha ka howl-gasha xududuudaha dalka (Garoomada, Dekadaha iyo Dhulka).
Tababarkaan oo socdey muddo afar maalmood ayaa ku saabsanaa sharciga iyo hababka socdaalka dalka, sharciyada caalamiga ah ee la xariira socdaalka, qaxootiga, iyo arrimaha bani-aadamnimada, habka bixinta dal ku galada, hubinta dukumentiyada safarka, iyo ka hortagga socdaalada sharci darada ah.
Saraakiisha ayaa sidoo kale booqdey garoonka caalamiga ah ee Adan Cade, iyaggoo soo arkay habka howl-fulinta socdaalka garoonka.
Agaasimaha guud ee Hay’adda Socdaalka iyo Jinsiyadda Soomaaliya ayaa kula dardaarmay saraakiisha qaadatey tababarka xaqiijinta ujeedada tababarka, ilaalinta amniga iyo sharciga, ka hortagga socdaalada sharci darada ah iyo ilaalinta sirta.
