Agaasimeyaasha Waaxyaha kala ah Tv-ga Qaranka iyo Wakaaladda Sonna, ayaa xilkooda si rasmi ah ula wareegay kaddib munaasabad xil wareejin ah oo ka dhacay xarunta wasaaradda Warfaafinta, Dhaqanka iyo Dalxiiska.
Munaasabadda Xil wareejinta ah waxaa ka qeyb-galay agaasimaha guud ee wasaaradda Warfaafinta, Mudane C/risaaq Cali Yuusuf (Bahlaawi), iyo masuuliyiin kale oo wasaaradda ka tirsan.
Agaasimihii hore ee Waaxda Telefishinka Qaranka ahna agaasimaha cusub ee Wakaaladda Wararka Soomaaliyeed ee Sonna, Mudane C/raxmaan Yuusuf Cumar (Al-Cadaala), ayaa xilka Waaxda tv-ga ku wareejiyey, agaasimaha cusub ee Telefishinka Qaranka, Mudane C/naasir Xuseen oo isagana horey u ahaa agaasimihii Waaxda Qorsheynta ee Wasaaradda Warfaafinta.
Agaasimaha Wakaaladda Sonna Al-Cadaala, ayaa faah-faahin kooban ka bixiyey waxyaabaha u qabsoomay mudadii uu xilka hayey, waxa uu sheegay in horumar weyn uu ku tallaabsaday Tv-ga Qaranka isla markaana ay hirgaleen mashaariic badan, kuwaas oo weli u baahan in la sii dardargaliyo, waxa uuna ku dardaarmay agaasimaha cusub ee Tv-ga in uu horey sii wado shaqada adag ee hor-taalla, isagoo ku sifeeyey agaasimaha cusub in uu yahay nin ka soo dhallaali kara shaqaan oo uu qeyb ahaa markii horeyba.
Sidoo kale Agaasimaha Xilka Tv-ga la wareegay Mudane C/naasir Xuseen, ayaa ugu horreyn ku ammaanay agaasime Cadaala guusha ballaaran ee uu gaarsiiyey Waaxda Telefishinka, isagoo xusay in uu yahay nin marxalad aad u adag ka gudbiyey Tv-ga taariikhduna ay xusi doonto, waxa uu intaa raaciyey in uu dhisi doono Fikir cusub oo lagu horumariyo Waaxda Tv-ga, si loo gaaro yoolka ugu dambeeya ee ah Sntv oo la tartama Telefishinnada adduunka ugu horreeya xiligaan, isagoo ugu dambeyn ka codaday agaasimihii horey in uu si hagar la’aan ah ula shaqeeyo weli.
Dhinaca kale Agaasimaha cusub ee Wakaaladda Sonna C/raxmaan Al-Cadaala, ayaa xilka Waaxda Wakaaladda Sonna kala wareegay Agaasimhii hayey xilkaasi hadana ah agaasimaha cusub ee Waaxda Radio Muqdisho.
dhammaadka munaasabadda, waxaa ka hadlay agaasimaha guud ee wasaaradda Warfaafinta, Dhaqanka iyo Dalxiiska, Mudane C/risaaq Cali Yuusuf, waxa uu ku ammaanay dhamman agaasimeyaasha Waaxyaha isbaddelka lagu sameeyo, sida dowlad wanaagga leh ee ay ula jaan-qaadeen arrintan, waxa uu sheegay in wasaaradda ay muujisay sida ay uga go’antahay ku dhaqanka maamul suubban.
