Agaasime Waaxeedyada Hay’adda Dhowrista Xogta Soomaaliya ayaa safar shaqo iyo aqoon kororsi ku tegay magaalada Nairobi ee caasimadda dalka Kenya, halkaas oo ay kulamo muhiim ah kula yeesheen dhiggooda hay’adaha dhowrista xogta ee Kenya.
Ujeeddada booqashadan ayaa ahayd xoojinta xiriirka iskaashi ee u dhexeeya labada dhinac, isbarasho iyo wadaagidda waayo-aragnimo ku saabsan hababka dhowrista xogta, ilaalinta xogaha qaranka, iyo horumarinta hannaan wada-shaqeyn oo rasmi ah oo dhexmara labada hay’adood.
Intii ay socdeen kulamada, waxaa si qoto dheer loo falanqeeyay fursadaha iskaashi, caqabadaha jira, iyo sida loo horumarin karo nidaamyada xog-ilaalinta ee labada dal, iyadoo si gaar ah diiradda loo saaray muhiimadda wada-shaqeynta hay’adaha xogta ee gobolka.
Booqashadan ayaa qeyb ka ah dadaallada ay Hay’adda Dhowrista Xogta Soomaaliyeed (DPA Somalia) ugu jirto dhismaha xiriirro adag oo ay la yeelato hay’adaha dhiggeeda ah ee Bariga Afrika, si loo xaqiijiyo maarayn xogeed oo casri ah, waxtarna u leh shacabka Soomaaliyeed.
