Agaasimaha Guud ee Agaasinka Deegaanka iyo isbeddelka Cimilada ee xafiiska Ra’iisul Wasaaraha Soomaaliya, Mudane Axmed Yuusuf Axmed, ayaa daahfuray qeybinta gaaska cuntada lagu karsado (LPG) oo uu Barnaamijka wadajirka ah ee UN ka iyo Agaasinka Deegaanka iyo Isbeddelka Cimiladu wada wadaan ee yareynta isticmaalka Dhuxusha ee PROSCAL ogu tala galay inuu ku yareeyo isticmaalka dhuxusha ee magaaladan Muqdisho. Sidoo kale waxa Agaasimaha Guud ee Agaasinka Deegaanka iyo Isbeddelka Cimilada , Mudane Axmed Yuusuf kala qeyb galay daahfurka qeybinta Gaaska qiimaha jaban Agaasimaha Guud ee Wasaaradda Batroolka iyo Macdanta ee dowladda Federaalka Soomaaliya, Mudane Maxamed Xaashi Carabeey. Barnaamijka yareynta isticmaalka dhuxusha ee PROSCAL ayaa ogu tala galay in uu maalmaha soo socda ka qeybiyo 1000 xabbo (13 KG cylinder, Stove, Hose and Regulator), kaas oo 59% ($59) uu barnaamijku bixinayo, halka qofkii doonaya inuu iibsado gaaska kaliya uu bixinayo 41% ($41).
Daahfurkaan maanta uu Agaasinku daahfuray gaaskan qiimaha jaban ayaa daba socda dadaallo uu Agaassinku ka waday dhammaan gobolada dalka iyo Caasimadda labadii sano ee la soo dhaafay. Agaasinku waxa uu hore uga qeybiyey magaalada Muqdisho iyo dhammaan dowlad Goboleedeyada dalka illaa iyo 5000 oo xabbo (13 KG cylinder, Stove, Hose and Regulator) si loo yareeyo isticmaalka Dhuxusha. Waxa uu uga duwan yahay daahfurkaan maanta qeybintii hore ee gaaska in macaamiishu ay la baxayaan qeyb ka mid ah qiimaha gaaska halka uu Barnaamijku bilaash ku bixinayey gaaskii hore loo qeybiyey, taas oo looga dan leeyahay in shacabku dareemaan lahaansho qalabka gaaska.
Macaamiisha doonaysa in ay iibsadaan gaaskan jaban , waxa ay la xiriiri karaan xarumaha shirkadda SOMGAS oo ku guulaysatay tartanka qeybinta gaaska. Shirkadda SOMGAS ayaa diyaar u ah in ay ka iibiso gaaska kor lagu xusay macaamiil kasta oo diyaar u ah inuu la baxo $41, illaa iyo gaarayaan tirada xaddidan ee 1000 xabbo.
