Fariin Madaxweynaha JFS Mudane Xasan Sheekh Maxamuud uu u diray Ciidanka Xoogga Dalka iyo Shacabka Soomaaliyeed.
Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo fariin u diray ciidanka iyo shacabka ayaa tilmaamay in Ciidamada Qaranka iyo dhallinyarada Difaaca shacabka ay dib u milicsadaan halkii howlgalku ka soo bilowday iyo guulaha maanta la gaaray ee ah in khawaarijta laga xoreeyay deegaanno iyo degmooyin dhowr ah, loona baahanyahay inay xoojiyaan dagaalka ka dhanka ah argagixisada.
Madaxweyne Xasan Sheekh ayaa yiri ” Dhulka baaxaddaa leh ee aad xoreyseen, dhulka baaxaddaa leh ee aad cadowga ka qabsateen, dhulka baaxaddaa la eg ayaa geesiyaal Walaalihiina ah oo magacyo leh ayay naftooda u hureen, sidoo kale geesiyaashaas waxaa ka mid ahaa ciidanka difaaca shacabka ee deegaannada, wiilal geesiyaal ah oo la garanaayo oo la yaqaano ayaa naftooda u huray oo ka tirsan deegaannada”
Madaxweynaha JFS ayaa xusay in deegaan kasta oo laga xoreeyay khawaarijta ay naftooda u hureen ciidamada qalabka sida oo kaashanaya shacabka deegaannada laga sifeeyay argagixisada iyo odoyaasha dhaqanka, isla markaana loo baahanyahay in la joogteeyo howlgallada ka dhanka ah argagixisada.
“Dagaalka wuu soconayaa, ma istaagayo, meelaha aan joogno ka soo noqon meyno, hore ayaana u soconeynaa. Guusha kama dambeysta ah ee aan raadineyno waan gaareynaa”. Ayuu yiri Madaxweynaha Dalka.
Madaxweynaha JFS Mudane Xasan Sheekh Maxamuud ayaa sheegay in Bulshada Soomaaliyeed ay maanta leeyihiin hal cadow, kaasi oo loo baahanyahay in loo midoobo sidii loo garab istaagi lahaa Ciidamada Qalabka Sida ee kaashana dhallinyarada difaaca shacabka, si guud ahaan dalka looga ciribtiro khawaarijta.
“Inaan u midowno oo mid noqono waa sida kaliya ee noo furan oo aan isaga saari karno cadowga, shacabka Soomaaliyeed ha garab istaageen meelkasta oo ay joogaan ciidamada qalabka sida, ha garab istaageen meelkasta oo ay joogaan Difaaca dadweynaha, difaaca shacabka, difaaca deegaanka wiilasha u istaagay ee jooga”.
