Allaha u naxariistee waxaa maanta lagu aasay qubuuraha Langata ee magaalada Nairobi marxuun Cismaan Cilmi Cadaawe oo ahaa muwaadin Soomaaliyeed oo si wayn looga qayanay gayiga Soomaaliyeed, waxaana marxuunka aaskiisa kasoo qayb galay muslimiin farabadan oo ay ka mid ahaayeen mas’uuliyiinta safaaradda Soomaaliya ee dalkani Kenya iyo xubno xilal horey uga soo qabtay dowladda Soomaaliya, iyo mas’uuliyiin ka tirsan dowlada Kenya.
Marxuunka ayaa waxaa salaadda jinaasada lagula tukaday masaajidka weyn ee xaafadda South C ee Magaalada Nairobi,waxaana intaasi kadib loo qaaday Qubuuraha Langata ee magaaladan Nairobi,halkaasi oo lagu aasay.
Markii uu soo dhamaaday aaska marxuunka ayaa waxaa tacsi u daray dhammaan ummadda Soomaaliyeed iyo ehelada uu ka geeriyooday mas’uuliyiin ay ka mid ahaayeen hogaamiyaha aqlabiyada baarlamaanka dalkani kenya Aadan Barre Ducaale, Danjiraha dowlada Soomaaliya dalkani kenya Jamaal Maxamed Xasan ,qunsulka safaaradda Soomaaliya ee dalkani Kenya Cali Begadi iyo mas’uuliyiin kale.
