Allaha u naxriistee Xildhibaan Maxamed Ibraahim Xaabsade oo 25-ka bishan Janaayo ku geeriyooday magaalada Muqdisho ayaa maanta aas Qaranka loogu sameeyay magaalada Baydhabo ee xarunta gobolka Baay.
Aaska ayaa waxaa ka qeybgalay Wasiiro iyo Xildhibaano ka tirsan dowladda dhexe ee Soomaaliya, masโuuliyiinta maamulka Koonfur galbeed,Siyaasiyiin iyo boqolaal dadweyne ah ayaa sidoo kale ka qeybgalay aaska Allaha u naxriistee Xildhibaan Maxamed Ibraahim Xaabsade oo kamid ah siyaasiyiinta ugu caansan Soomaaliya gaar ahaan deegaanada Koonfur galbeed.
Magaalada Baydhabo oo ah halka lagu aasayo Xildhibaan Maxamed Ibraahim Xaabsade Allah u naxriistee ayaa lagu soo waramayaa in inta badan goobaha ganacsiga Baydhabo ay albaabada la isugu dhuftay waxaa sidoo kale xakad la geliyay isu socodka gaadiid iyo dadweynaha magaalada Baydhabo iyadoo sidoo kale si weyn loo adkeeyay amaanka Baydbabo.
Allaha u naxriistee Xildhibaan Maxamed Ibraahim oo ka tirsanaa mudaniyaasha Baarlamaanka Soomaaliya ayaa waxaa uu kamid ahaa siyaasiyiinta Soomaaliyeed waxaana uu sidoo kale uu kamid ahaa Hoggaamiyayaashii kooxaha Soomaalida.
Xidlhibaan Xaabsade ayaa waxaa uu xilal kala duwan uu ka soo qabtay dowladihii KMG ee soo maray Soomaaliya, waxaana dadka yaqaanay shakhsiyadiisa ku tilmaameen in uu ahaa nin aan ka leex leexan fikirka uu aaminsanyahay isla markaana u hadla si laab furnaan ah.
