Duqaynta ay geesteen Ciidamada Maraykanka ayaa 12-kii bishan ka dhacay deegaan lagu magacaabo Saala-weyn oo u dhaxeysa Degmada Galhareeri iyo Caga-cadde ee Gobolka Gal-guduud, Maleeshiyaadkaasi ayaa ujeedadooda aheyd inay dagaal la galkaan Dad shacab ah oo iskood isku abaabulay oo la baxay Macaawisleey oo ka unkumay Deegaanno ka tirsan Gobolka shabeelada dhexe, iyadoo ay kuwo magacaasi la mid ah ay horey uga jireen Deegaano ka tirsan Gobolka Hiiraan, sida ay Dadka deegaanku u sheegeen Wakaaladad Wararka Soomaaliyeed ee SONNA.
Duqeyntan oo dhacday Jimcihii aynu ka soo gudubnay ayaa qoraal ka soo baxay ciidamada Maraykanka ee AFRICOM, ayaa lagu sheegay in duqeyntan ay qeyb ka ahayd howlgalo wadajir ah oo ay wadeen ciidamo Maraykan ah iyo kuwo Soomaali ah, sida lagu sheegay warka ay faafisay Taliska Ciidanka AFRICOM, waxaana Warkan ka soo baxay ciidamada Maraykanka ee Africa ay sidoo kale lagu sheegay in duqeyntan aysan wax ku noqon dad rayid ah, iyadoo ay adag tahay in si sax ah loo ogaado khasaarihii ka dhacashay halkaasi.
Dadka Deegaanka ayaa Wakaaladda Wararka Soomaaliyeed ee SONNA u sheegay inay intii aan duqeynta loo geysan Maleeshiyaadkaasi ka tirsan Al-shabaab ay arkayeen Gawaari badan oo ay saarnaayeen Kooxdu, kana yimid dhanka Degmada Xarardheere ee Gobolka Mudug, kadibna ay Habeenkaasi maqleen dhawaq aad u culus, taasi oo markee dambe la caddeeyay inay aheyd duqeyn dhinaca Cirka ah oo ay geysteen Diyaaradaha Dalka Maraykanka oo saaxiibo dhow la ah Dowladda soomaaliyeed.
Dadka Deegaanka ayaa waxaa kaloo ay sheegeen ka sokow dhimashada Maleeshiyaadka ay jira hor joogayaal muhiim u ahaa Al-shabaab oo duqeyntaasi ku dhintay, kuwaasi oo saarnaa Gaari kuwa raaxada ah, balse lama sheegin magacyadooda, iyadoo dhinaca Maleeshiyaadka al-shabaab aan wali wax war ah laga helin oo ku saabsaan duqeyntaasi.
Taliiska Africam ayaa sheegtay Xalay in duqayn Maraykanku uu ka geystay bartahama Soomaaliya lagu dilay ku dhowaad 60 ka tirsan maleeshiyada ururka Al-Shabaab, iyadoo Ciidamada Milatariga Maraykanka ee Afrika Africom ay ku sheegay in ay duqeyn ka geysteen deegaan ku dhow Degmada Xarardheere ay ku dileen ilaa lixdan ka tirsan maleeshiyaadka Al-Shabaab.
Waa markii labaad ee sannadkan diyaaradaha Maraykanka ay duqeyn ka geystaan bartahama Soomaaliya, iyadoo ay duqeyntani tahay tii ugu dhimashada badneyd ee lala eegto Al-Shabaab muddo sanad ah, Waxaana la xasuusan yahay in duqeyn dhacday bishii November ee 2017-kii lagu dilay 100 ka tiran Maleeshiyaadka Kooxda Al-shabaab, sida Taliska Ciidanka Africom ee Dalka Mareykanka ay sheegeen.
Guud ahaan, ama celcelis ahaa sannadkani oo kaliya waxa uu Maraykanku ka geystay Soomaaliya 27 duqaymood, kuwaasi oo lala beegsaday Horjoogayaal, Xerooyin Ciidan iyo meelo ay iska soo abaabulaan.
Isku soo wada duuboo duqeymaha dhinaca cirka ah iyo weerada dhinaca Dhulka ah ee lagu hayo Maleeshiyaadka Al-shabaab ayaa ah kuwo sii wiiqaya awoodda oo horeyba u sii liidatay, waxaana la filayaa haddii sidaasi lagu sii wado duqeynta iyo weerada dhulka in gabi ahaanba laga ciribtiro dhulka Soomaalida, marka waxaanu leenahay alleylehe Al-shabaab jab baa ku dhacay.
Wakaaladda SONNA
