Madaxweynaha dalka Guinea Alpha Conde ayaa markii labaad ku guuleystay xilka madaxtinimada doorashadii ka dhacday dalka sida ay sheeciyeen gudiga doorashooyinka, lix maalin ka dib markii doorashada la soo geba gebeeyay.
Mr Conde, ayaa heley 77, cod wareegii koowaad taas oo la mid ah 58% dhamaan codadkii la dhiibtay .
Hogaamiyaha xisbiga mucaaradka ninka lagu magacaabo Cellou Dalein Diallo, oo dhiiley qaabka doorashada u dhacday ayaa heley 31% cod, waxaana taageeriyaashiisa ugu baaqay in ay ka soo qeybgalaan dibad baxyo nabadeed oo natiijada looga soo horjeedo.
Kor joogtada ka socotay midowga Yurub ayaa sheegay in doorashada ay tahay mid si xaq ah u dhacday inkastoo ay jireen khaladaad dhanka farsamada ah.
Musharaxiinta ayaa heysta muddo sideed maalin ah oo maxkamadda dastuuriga ay cabashadooda ku hor keeni karnaa si cabashadooda loo dhageysto.
Si kastaba ha ahaaatee , Mr Diallo ayaa war qoraal ah oo uu soo saaray ku sheegay in cabashadiisa uusan maxkamadda geyn doonin.
” Waxaan ugu baaqayaa musharaxiinta kale iyo muwaadiniinta dhibanaha u ah doorashadan in ay ka soo qeybgalaan mudaaharaad nabadeed si loo muujiyo khaladaadka jira,” ayuu yiri.
Mr Diallo ayaa tartanka ka baxay maalintii Arbacada ee la soo dhaafay markaas oo uu sheegay in doorashada lagu shubtay.
Eedeymaha uu soo jeediyay ayaa waxaa kamid ah in ku dhowaad 400 oo xarumood oo codadka laga dhiibanayay ay saacado badan aan la furin iyo in sanaadiiqda qaar waraaqo been ah laga buuxiyay.
Tirada maalintii Jimcaha la sii daayay ayaa muujinaysa in 66% oo kamid ah lixda Milyan ee dadka dalka Guinea la diiaangeliyay.
Tani ayaa ah doorashadii labaad oo si dimoqraadi ah uga dhacda dalka Guinea tan iyo markii ay xoriyadda ka qaateen dalka France sanadkii 1958.
Waxaana la soo wariyay in intii lagu guda jiray ololaha doorashada ay dhaceen rabshada ay dad ku dhinteen.
Mr Conde ayaa madaxweyne noqday sanadkii 2010 taas oo aheyd doorashadii ugu horeysay oo dalkaasi ka dhacda kadib dagaalo labaadan sano jirsaday oo u dhaxeeyay rag ku loolamayay madaxtinimada dalkaasi.
