Labo ayaa dhimatay tiro kalena waxaa la soo sheegayaa in ay ku xanuunsadeen ka dib markii ay ka cabbeen ceel ku yaala duleedka degmada Maxaas ee gobolka Hiiraan oo ay alshabaab sumeeyeen, sida ay sheegeen saraakiisha degaanka.
Guddoomiyaha degmada Maxaas Muumin Maxamed oo la hadlay Radio Muqdisho ayaa sheegay in alshabaab ay sumeeyeen ceel biyoodka tuulada Jiqoow oo ka tirsan degmadaas, ayna waxyeelo ka soo gaartay dadka iyo duunyo.
Waxaa uu intaas ku daray in maleeshiyaadka alshabab ay si dhuumaaleysi ah ku soo galeen tuulada ka dibna ceelka ku shubeen walxo sun ah si ay u laayaan dadka iyo xoolaha ceelkaas biyaha ka caba.
