Sheikh Tamim Bin Hamad al-Thani Amiirka dalka Qatar ayaa sheegay in ay diyaar u yihiin garab istaaga walaalahooda Turkiga,
Amiirka Qatar ayaa dhawaaqay maalgashi dhan $ 15-bilyann oo ay ku sameynayaan Suuqyada iyo Bankiyada dalka Turkiga.
Amiirka ayaa arintan uga dhawaaqay kulan magaalada Ankara uu kula yeeshay madaxweynaha dalka Turkiga Rajab Dayib Erdogan.
Turkiga ayaa hadda galay xaalad go’doomin dhaqaale kaddib xiisad adag oo soo kala dhax-gashay Turkiga iyo dowladda Mareykanka.
Amiirka Qatar ayaa ah mas’uulkii ugu horeeyay ee booqday caasimada dalka Turkiga ee Ankara tan iyo markii uu soo ifbaxay qalalaasaha dhaqaale ee u dhaxeeya dowladdaha Mareykanka iyo Turkiga.
Sidoo kale labada mas’uul ayaa ka wada hadlay sidii loo sii xoojin lahaa xiriirka ka dhaxeeya labada dowladood Qatar iyo Turkiga.
Amiir Sheikh Tamim ayaa noqonaya mas’uulkii ugu horeeyay ee ku dhawaaqa in dalkiisu barbar taagan yahay Turkiga oo hadda wajahaya dagaal dhinaca ganacsiga ah oo uga imanaya Mareykanka.
