Wasaaradda arrimaha gudaha iyo Federaalka ayaa aqoon isweydaarsi looga hadlayay geedi socodka horumarka u qabatay xubno ka socday qeybaha bulshada ee ku nool magaalada Baladweyne ee gobolka Hiiraan.
Aqoon iswaydaarsigan oo socon doono muddo shan cisho ah ayaa waxaa ka qeyb galay odoyaasha dhaqanka, culimaa’udiinka iyo dhalinyarada, waxaana looga wada hadlayaa muddada uu socda sida lagu horumarin karo guud ahaan deegaannada gobolka Hiiraan.
Madaxa hay’adda CRD Xasan Kuuriya ayaa sheegay in siminaarkan ay soo qaban qaabisay Wasaaradda Arrimaha gudaha, isla markaana taabo galkiisa ay iska kaashanayaan hay’adaha CRD iyo UNDP, isagoo intaa ku daray in aqoon iswaydaarsiga nuucaanii oo kale ah ay ku qaban doonaan dhamaan gobollada dalka.
Maxamed Ibraahim oo ah Guddoomiye ku-xigeenka siyaasadda ee Gobolka Hiiraan oo furay aqoon iswaydaarsiga ayaa xusay in ay soo dhaweynayaan in qeybaha bulshada gobolka ay ka tashadaan aayahooda, isagoo ku booriyay inay soo saaraan go’aanno wax tar u leh bulshada gobolka ku dhaqan.
