Aqoon kororsi iyo cilmi baaris la xiriirta Bad iyo Bari ayaa maanta lagu soo gabo gabeeyay magaalada Qaahira ee xarunta dalka Masar.
Aqoon kororsigan oo socday muddo dhowr iyo toban cisho ah ayaa waxaa ka qeyb galay khuburo ka kala socday 30 wadan oo Qaarada Afrika ku yaala, waxaana dhanka Soomaaliya uga qeyb galay lataliyaha dhanka Dalxiiska ee Wasaaradda Warfaafinta Yaasir Maxamed Baafo, oo madasha la isku dhaafsanayay aqoon kororsiga kheyraadka dalxiiska ka jeediyay warbixin dheer oo uu uga hadlayay in Soomaaliya ay tahay dal leh goobo badan oo dalxiis ah, isla markaana ay dowladda Soomaaliya ka go’an tahay iney soo nooleyso dalxiiska.
Aqoon isweydaarsiga ku aadan wadamada Afrika ee Kheyraadka dabiiciga dalxiiska ayaa waxa soo qaban qaabiyay iskana kaashaday Wasaaradaha dalxiiska iyo arrimha dibadda ee Masar.
“Socdaalkeenna waxu ahaa socdaal ay iska kaashanayeen dowladda Soomaaliya gaar ahaan Wasaaradda dhaqanka iyo dalxiiska iyo dowladda Masar, taaso loo bandhigay wadamo badano Afrika iney kaso qeyb galaan Soomaaliya wadamadii ajiibay ayey ku jirtay kadibna laga codsaday dad khuburo ah iney soo diraan maadama cilmi baaris uu yahay, sidaas ayana ku imid anoo matalaya guud ahan dowladda, gaar ahaan Wasaaradda, waxaan kamid ahaa dad gaaraya ila 30 dal oo Afrikaan ah, kuwooda ugu waaweyn ee arrimaha dalxiiska ugu horumarsan, Soomaaliya xubin ayey ka ahayd oo shirkaas cilmi baarista ah kaso qeyb galay waxaana u socday 14 cisho” ayuu yiri Yaasir.
Sidoo kale Mudane Yaasir Baafo ayaa xusay in Wasaaraddu ay waddo dedaal ku aadan sidii caalamka loo tusi lahaa in Soomaaliya ay dib u soo ceshaneyso goobihii ay caanka ku ahayd ee dhanka Dalxiiska ah.
“Waxan kaso qeyb galnay shir ka dhacay Malaysia hadana midkaan ayan joogna waxaas oo dhan markii la isku soo duubo waxay cadeyneysa dadaalka aan ugu jirno in caalamka aan tusno dalxiiska Soomaliya, si guud Soomaaliya ayaa aduunka u sahlayso iney diyaar u tahay in indhihii aduunka aan dib uso celino oo maanta waxa ka dhaca Soomaaliya aan kala simanahay aduunka intiisa kalle” ayuu yiri Baafo
Soomaaliya oo isbadal dhinacyo badan sameysay sanadihii ugu danbeeyay ayaa u suurto gashay dhawaan iney xubin buuxdo ka noqoto hay’adda dalxiiska adduunka ee Qaramada Midoobay.
W/D: Wariye Mowliid Moha
