Labo iyo taban arday oo ka baxday dugsiga dhexe ee iskuulka Indhoola yaasha Al-Nuur ayaa maanta waxaa shahaadooyin lagu gudoonsiiyey munaasabad ka dhacday magaalada Muqdisho oo ay ka qeyb galeen Wasiirka howlaha guud iyo dib u dhiska, Wasiir ku xigeenka Wasaaradda Waxbarashada, mas’uuliyiin ka socday xafiiska Ra’iisul wasaarah iyo hormuud Foundation oo munaasabaadan soo qaban qaabiyey
Wasiir ku-xigeenka Wasaaradda Waxbarashada Xaamud Cali Xasan ayaa munaasabada ka sheegay in wax lagu farxo ay tahay arday arag la’ oo heerkaan qaaray, isagoo maamulka iskuulka Al Nuur ku wareejiyey iskuulkii howlwadaag oo ay dowladdu lahayd.
“Waxaaan ugu bishaaraynayaa maanta maamulka Al Nuur in aaan ku wareejinay iskuulka howlwadaag oo hormuud gacan ka geysan doonto iskuulkaas oo aad loo balaarin doono”ayuu yiri Wasiir ku-xgienka Waxbarashada.
Wasiirka howlaha guud iyo dib u dhiska Saalax Sheekh Cismaan ayaa sheegay in Wasaaradiisu ay garab taagan tahay dadka araga la’ isaga oo balan qaaday in ay gacan ka geysanaan dib u dhiska iskuulka lagu wareejiyay.
“Waxaan diyaaar u nahay in aan dhisno iskuulka Wasaaradda Waxbarashad ugu deeqday ardaydaan gacanta u baahan waliba waxaan u dhisi doonaa hab casri ah”ayuu yiri Eng, Saalax.
Wasiir ku xigeen wasaarada waxbarashada ayaa ugu dembeentii ardaydii kaalmaha 1aad 2aad iyo 3aad kala galay guddoonsiiyey hadiyo loogu tala galay oo laabtoobyo kamid ahaayeen.
