Ardada dhigata fasalka BPA06 ee Jamacadda SIMAD oo ka mid ah Jamaacadaha ka dhisan dalka, isla markaana barta Kuliyadda dhaqaalaha iyo Cilmiga bulshada ayaa waxaa ay soo qaban qaabiyeen kulan balaaran oo looga hadlayay soo nooleynta iyo horumarinta Afka hooyo, kaas oo lagu qabtay xarunta Jamaacadda qaybteeda KM4, iyadoo kulan cilmiyeedkaas ay ka qayb galeen Agaasimaha Guud ee Wasaaradda Hidaha iyo Tacliinta Sare, Abwaanno iyo marti sharaf kale.
Qaar ka mid ah ardaydii soo qaban qaabisay kulan cilmiyeedka oo la hadlay Warbaahinta Qaranka ayaa sheegay in ay garteen sidii bulshada loogu soo bandhigi lahaa sida uu u lumayo Af-ka hooyo, isla markaana loo baahanyahay in loo wada istaago sidii loo soo nooleyn lahaa.
Related posts
Qaar ka mid ah ardayda ayaa yiri โMarkii aan aragnay in Afka Hooyo uu lumay, waxaan garwaaqsanay in aan sameyno barnaamijkan oo noo soo socday muddo saddex bil ah, runtii aad baan ugu faraxsanahay in aan maanta soo gudbino siyaabaha lagu soo nooleyn karo afka Hooyoโ
Qaar ka mid ah Abwaaniinta Soomaaliyeed ee ka qayb galay kulanka looga hadlayay hormarinta Afka Hooyo oo ay ka mid ahaayeen Abwaan Siciid Maxamed Xarawo iyo Abwaan Xirsi Dhuux Maxamed ayaa waxaa ay sheegeen in Afka Soomaaliga uu qatar ku jiro, loona baahanyahay in Ummadda Soomaaliyeed ay u istaagto dib u soo nooleynta Af-ka Hooyo, iyagoo Warbaahinta iyo xarumaha Waxbarashada Dalka ugu baaqay in ay hormuud u noqdaan dib u soo nooleynta afka hooyo.
C/xamiid Xasan Wehliye Madaxa kuliyadda Dhaqaalaha iyo Cilmiga bulshada ayaa bogaadiyay dadaalka ay ardaydu sameeyeen ee ah sida lagu soo nooleyn karo Af-ka Soomaaliga, isagoo xusay in cilmi baarista ay sameeyeen ardayda uu qeyb weyn ka qaadan karo horumarinta tacliinta sare ee dalka.
Agaasimaha Guud ee Wasaaradda Hidaha iyo Tacliinta Sare ee Xukuumadda Soomaaliya Ismaaciil Yuusuf Cismaan oo gaba gabadii ka hadlay kulan Cilmiyeedka ayaa waxaa uu u Mahad celiyay Ardada Jaamacadda SIMAD ee isku howlay soo bandhigidda barnaamijkan, waxaana uu xusay in Wasaaradda ay qaadaneyso Doorka uga aadan horumarinta Afka Hooyo.
