Ardaydan oo tiro ahaan ku dhowaa 300 ayaa kala ahaa Bachelor-ka iyo Master degree ayaa ka qalin jabiyay Jaamacada Hope oo kaashanaysa jaamacadda Kampala, ayaa maanta xafladii loo qabtay waxaa ka qeybgalay mas’uuliyiin ka tirsan dowladda Soomaaliya, maamulka jaamacadda iyo ardayda xafladda loo qabtay.
Madaxa jaamacadda Hope ee magaalada Muqdish, Maxamed Sheekh C/raxmaan (Badri) ayaa faahfaahinaya qeybaha ardaydan ay ka kooban yihiin.
Guddoomiyaha akadeemiyadda fanka iyo suugaanta, Dr Cismaan Yuusuf Maxamed Jirfe oo kamid ahaa mas’uuliyiintii xafladda lagu casuumay ayaa ardayda Soomaaliyeed ku booriyay in ay ku dadaalaan cilmi baarista..
”Ku dadaala taariikhda iyo cilmi baarista markii ay dowladda dhacaysay dadka archeologist ahaa afar kali ah ayay ahaayeen halka dalalka dariskeena ah ay boqolaal iyo kunanaan ay ku xisaabtamaan” ayuu yiri Dr Cismaan.
Prof. Najiib Sheekh C/kariim, oo ah guddoomiyaha guud ee jaamacadda Hope ayaa ardayda u sheegay in uu wadanka xil weyn uu ka saaran yahay sidaa darteedna looga baahan yahay in ay ku fikiraan horumarkiisa.
“ Adinkoo og in dhinacna idin fiyoobeen ilaa intii ay dowladdu burburtay ileen dowladu hal maalin a dhicinee maalinba waxbaa dumayay, in ummaddaan dulaal iyo malaal carab iyo ajami aynan u kala eexan laakiinse aan wali noolnahay walina aan ordayno” ayuu hadalkiisa ku daray Prof. Najiib.
Ra’iisul wasaarihii hore ee Soomaaliya Cali Maxamed Geedi ayaa xafladda ka sheegay in dhalinyarada ay u istaagaan samatabixinta dalka maadaama ay yihiin mustaqbalka wadanka.
“Soomaaliya population ay tahay waa garanaysaa 10 -12 milyan kheyraadka ay leedahayana Afrika inta ka bato ayaa meelo kale la siin geyn karaa, waxa idin sheegayaa cilmi baare Swedish ah 2000 ayuu qorey article uu leeyahay Soomaaliya 20 sano ee socota waxaa ay noqon karta dalka ugu visaha qaalisan aduunka” ayuu yiri Geedi.
Gabagebadii mas’uuliyiintii xafladda ka soo qeybgalay ayaa shahadooyin ku gudoonsiiyay ardaydii maanta xafladda qalin jabinta loo qabtay.
