Maleeshiyada Al-Shabaab ayaa dadka deegaanada ay gacanta ku hayaan ku qasbay iney bixiyaan midkood lacag ama xoolaha nool ee ay dhaqdaan sida Lo’da,ariga iyo Geella inta lagu guda jiro bisha Muharam oo ah bisha koowaad ee sanadkan cusub ee Islaamka,taasi oo ay ugu yeereen Zakawaad Balse ah mid baad ah.
Ku dhowaad 700-Qof oo isugu jira rag iyo dumar , kuwaasi oo u muuqday inay ka caga jiideen u hogaansamida amarka Argagixisada ee bixinta lacagaha iyo Xoolaha nool, ayaa lagu xiray degmada Jilib ee gobolka Jubbada dhexe,labadii todobadii ee ugu horeeyay Bisha,Muharam.
“Qiyaastii 700 oo qof, raga iyo dumar oo ay ku jiraan qoyskayga iyo qaraabbadeyda ayaa lagu xiray magaalada Jilib, oo qiyaastii 380 Km dhinaca koonfureed kaga beegan Muqdisho horaantii bishan, ka dib markii ay su’aal ka keeneen qadarka lacagta ay ku soo rogeen Al-Shabaab. Waxaan maqlay in dadkani intooda badan la sii daayay, inkastoo ay aqbaleen dalabka “, ayuu sheegay nin la hadlay SONNA oo xaalad amni magaciisa loo sheegin.
Qof ka mid ah deegaanka oo diiday in magaciisa loo adeegsado warbaahinta wuxuu u sheegay Wakaaladda Wararka Soomaliyeed ee SONNA in uu xabsiga magaalada Jilib uu ku jiray saddexdii cisho ee ugu dambeeysay, isaga oo sheegay in dad kale ay dammaanad qaadeen sii deyntiisa.
“Xag-jiriinta al-Shabaab waxa ay igu amreen inaan bixiyo 200 oo doollar Maraykanka ah waxaana u sheegay inaan awoodi karin lacagtaasi, sababtoo ah waxaan ahay beeraleey dagaal ugu jira sidii uu ku soo saaran lahaa rootigiisa maalinlaha,kadibna waxay i dhigeen xabsi saddex cisho aan ku xirnaa,” ayuu yiri.
Waxa uu sheegay in Argagixisada Al-Shabaab ay u sheegaan dadka deegaanka in ay doonayaan in ay lacagtan baadda ah Dugsiyo kaga dhisaan halkaasi
SONNA oo wareysi la yeelatay qof saddexaad, oo ka soo jeeda magaalada Saakow ee ka tirsan Gobolka Jubbada dhexe ayaa sheegay in maleeshiyada Al-Shabaab ay weydiisteen inuu bixiyo 100 doolar oo ay ugu sheegeen in lagu dhisayo Dugsi.
“Al-Shabaab waxay dadka ka qaadayaan inta u dhaxaysa 100 illaa 400 oo doollar oo qof kasta ah, waxay qaataan baad iyo dalabyo kale oo degdeg ah oo laga qaadayo Qoys kasta iyo shaqsi intaba, ha ahaado ganacsade, beeraley ama shaqo la’aan intaba, waana waajib” ayuu yiri.
Dadka deegaanka ayaa intaasi ku daray in Maleeshiyada Al-Shabaab ay Dugsiyada gobollo kala duwan ka afduubtaan ardayda hibada sare ama wax soo saarka Eebe u siiyay si ay u baraan ama uga dhaadhiciyaan aragtidooda ku saleysan Argagixisinimada.
Kooxda argagixisada Al-Shabaab ayaa dadka ku nool koonfurta iyo bartamaha Soomaaliya si xoog ah kaga uruursada Xoolaha nool ee ay dhaqdaan sida Lo’da,Geela iyo ariga,waliba waxay si gaar ah u bartilmaameedsadaan xoolaha buur buuran ama Suuq-geynta ku haboon.
Laakiin tallaabadan ayaa ka careysiisay dadka Xoolaha dhaqatada ah ee ku nool gobollada Hiiraan iyo Shabeellaha Dhexe,kuwaasi oo isku abaabulay si isaga dul qaadaan gumeysiga iyo dhagarta maleeshiyada Kooxda argagixisada Al-Shabaab.
