FAALLO:-Xilli Galab Casir bilicsan 5-ta Maarso, 2020-ka, ayay kumaandooska Soomaaliya ee Danab u dabbaaldegeen qalinjabinta tiro ka badan 80, kuwaa oo ka tirsan xoogagga dagaalyahannada.
Askartaan iyo Saraakiisha da’da yar oo leh xirfado iyo xeelado dagaal gaardis ku mareen barxadda gaaddisocodka, iyaga oo uu qab iyo diyaar garoow buuxa ka muuqdo, taasoo ka dhigan horukaca ku socda aqoonta iyo awoodda xirfadeed ee Ciidanka Danab.
Kumaandooskan cusub ayaa buuxinaya dowrka qorsheynta hawlgallada, tababarrada, iyo khibradda saadka (logistics) ee guutada iyo istaafka gaaska Danab.
Sida lagu yaqaano urur walba oo xirfad ku dhisan, hawlgal walba oo la fulinayo waxaa muhiim u ah qorshaynta, haqabtirka iyo sii odorisidda waxyaalaha imaan kara. Unugyada Danab waxaa talo siiya Ciidamada Gaarka ee Mareykanka oo looga dambeeyo qorsheynta iyo isu-diburidka.
Dowladda Soomaaliya iyada oo garab ka helaysa saaxiibkeeda ugu dhaw ee Mareykanka ayay qaadeysaa tallaabooyin wax ku ool ah oo ay dhidibbada ugu aasayso nabadda, ammaanka iyo barwaaqo ay helaan muwaadiniinta sharafta leh ee Soomaaliyeed.
Unugyadan cusub ee kumaandooska Soomaaliya ee kusoo biiray ciidanka ayaa ka shaqeyn doona xarunta dhexe ee ciidanka, iyaga oo bixin doona khibradaha uu u baahddo taliskoodu. Khibradaha ay soo biirin doonaan waxaa ka mid ah qorshaynta, haqabtirka, odorosidda iyo fududeynta tababarrada ku aaddan kala firdhinta awoodaha (cadowga), weecinta, iyo jabinta cadowga ee leh heer walba ee qaybaha meletariga oo ay ku jirto lafaguridda (taxliilinta) dacaayadda cadowga, diridda farriimaha iyo shaacintooda, iyo iska caabbinta wararka kooxaha argagaxisada iyo cid kasta oo cadow ku ah Qaranka.
Tan waxay aad uga duwantahay falalka ay ku kacaan fulayada Alshabaab, Danab waa hoggaan aammin ah oo hawlahooda lagula xisaabtamo, islamarkaana shacabka Soomaaliyeed gaarsiiya macluumaadkooda.
Xirfaddan dheeriga ah ee ay kasbadeen ciidanka Danab ayaa u oggolaanaysa in ay si weyn ugu guuleystaan hawlgalladooda ka dhanka ah Kooxda Al-Shabaab ee xiriirka la leh Alqaacida, gaar ahaan Hawlgalladii dhawaa, sida kii Ceel Saliini oo koox ilaa 30 Al-Shabaab ahi isku dayeen in ay cagta mariyaan xerada ciidanka.
Raggan iyo dumarkan ciidanka ah ayaa xoojinaya jiilka soo koroaya si ay Soomaaliya uga ciribtiraanaan dhagarta Al-Shabaab, islamarkaana u soo celiyaan nabaddii iyo ammaankii waqti dheer ay sugayeen dadka Soomaaliyeed oo ah mid ay xaq u leeyihiin.
W/Q: Afhayeenka Wasaaradda Warfaafinta
Mud: Ismaaciil Mukhtaar Cumar (Orange)
