Sadex qof oo labo askar yihiin ayaa dhimatay ka dib markii madaafiic lagu weeraray saldhig Mareykanka iyo xulafadiisu ku leeyihiin waqooyiga magaalada Baghdad, sida ay sheegeen saraakiisha Mareykanka.
“Waxaa si dhow ula soconaa xaaladda saldhiga Taji,” ayuu yiri sarkaal Amerikaan ah. “Ma doonayo in aan ka hor dhaco baaritaanada socda.”
Warbaahinta Mareykanka oo soo xiganaya saraakiil ayaa sheegtay in dadka weerarka lagu dilay ay kala yihiin labo askari oo u kala dhashay Britain iyo Mareykanka iyo qandaraasle Amerikaan ah.
Weerarkan gentaal ayaa noqonaya kii 22 aad oo danaha Mareykanka lagu beegsado tan iyo bishii October, sida uu sheegay taliye Ciraaqi ah.
Colonel Myles Caggins, oo ah afhayeenka ciidanka Mareykanka ee dalka Ciraaq ayaa qoraal Twitter soo dhigay ku sheegay in 15 gentaal oo yaryar ku soo dhaceen saldhigga, laakiin faah faahin intaas ka badan ma uusan bixinin.
Saraakiil Amerikaan ah oo magacood qariyay oo la hadlay wakaaladda AP ayaa sheegay in faah faahinta weerarkan goor dhow shaacin doonaan.
Sidoo kal, xoghayeyaasha arrimaha dibadda Mareykanka Mike Pompeo iyo dhigiisa Britain Dominic Raab ayaa wacad ku maray in lala xisaabtami doono kuwii ka dambeeyay weerarkan.
Ka dib wadahadal telefoonka ah oo ay wada yeesheen ayay hoosta ka xariiqeen ahmiyadda ay leedahay in kuwii mas’uulka ka ahaa lala xisaabtamo, sida lagu sheegay bayaan ka soo baxay waaxda arrimaha dibadda.
Saldhigga Taji, oo ku yaala waqooyiga Baghdad, waxaa muddo sanado ah uu ahaa xero tababar. Ilaa 6,000 askari oo Mareykanka ah ayaana degan, saldhiga waxaa tababar iyo la talin ku aadan la dagaalanka argagaxisada lagu siiyaa ciidanka Ciraaq.
Weerar gentaalo ah oo horey loola beegsaday askarta Mareykanka iyo xarumo diplomaasiyadeed ayaa waxaa ku dhintay qandaraasle Mareykanka ah iyo askari Ciraaqi ah, mana jirin cid sheegatay mas’uuliyadda weeraradan, laakiin Washington waxay ku eedeysay maleeshiyaad Iran taabacsan.
Labo maalin ka dib dhimashada qof Amerikaan ah oo lagu dilay weerar lagu qaaday saldhiga magaalada Kirkuk Mareykanku ku leeyihiin, dhamaadii sanadkii hore, Mareykanku waxaa ay weerareen shan goobood oo ku kala yaala Ciraaq iyo Suuriya halkaas oo fadhiisan u ah kooxda Kataaib Xezbulah. Kooxda Kataib Hezbollah ayaa Mareykanku liiska argagaxisada ku daray 2009.
Xiisadda Washington iyo Tehran ayaa kor u kacday markii drone Mareykanku leeyahay lagu dilay taliye Irani ah oo awood badan Qassim Suleimani oo ahaa taliyihii guutada Qudus ee ilaalada kacaanka Iran iyo Abu Mahdi al-Muhandis, oo madaxa u ahaa kooxda Kataib Hezbollah, dilkaas oo 3 Janaayo ka dhacay Baghdad. Dilka saraakiishaas ayaa keenay in labada dal ku sigtaan isku dhac toos ah uu dhex mara.
Waxaa xigay in baarlamaanka Ciraaq u codeeyaan in dhammaan ciidanka ajnabiga ah oo Mareykanku kamid yahay ka baxaan dalka Ciraaq, laakiin go’aankaas wali xukuumadda Ciraaq ma fulinin.
ISHA: ALJAZEERA
