Xukunkan dilka ah ayaa saaka maxkamada ciidanka qalabka sida ee Soomaaliya ku fulisay, Axmed Cabdi Maadeey oo 28 sano jir ah isla markaana ka tirsanaa ciidanka booliiska Soomaaliya kaas oo degmada Afgooye ee gobolka Shabeelaha hoose ku diley nin la oran jirey Maxamed Cali Cabdalla 05-01-2016.
Xeer ilaalinta maxkamdda ciidanka qalabka sida Soomaaliya ayaa sheegtay in askarigan xafiiskoodu uu ku soo oogay dambiga ah in uu dil ula kac ah u geystay qof shacab ah, waxayna maxkamdda darajada koowaad ee ciidanka qalabka sida ay ku xukuntay in uu bixiyo diyada ninka la diley.
Hase ahaatee, waxaa xukunkaasi racfaan ka qaatay gacan ku dhiigle Axmed Cabdi Maadey, iyadoo dhageysiga dacwadiisa ay u fadhiisatay maxkamada sare ee ciidanka qalabka sida ee Soomaaliya taas oo markii ay ku qanacday cadeymihii ay soo bandhigeen xeer ilaalinta ay ku xukuntay dil toogasho ah oo ah qisaastii Maxamed Cali Cabdalla allah u naxariistee.
