Baarlamaanka maamulka Galmudug ayaa maanta cod aqlabiyad leh ku meel mariyay qaraarka dhamaystirka habraaca degmonimo ee magaalada Guriceel ee gobolka Galgaduud.
Bishi hore gollaha wasiirrada dowlad goboleedka Galmudug ayaa shirkii lagu qabtay Guriceel ku ansixiyey degmonimada Guriceel.
Wasaradda arrimaha gudaha Galmudug ay maanta hor gaysay baarlamaanka qaraarkan oo warbixintiisa lagu cadeeyay in Guriceel ay buuxisay dhammaan shuruudihii looga baahnaa in ay noqoto degmo buuxda.
Kulan ay maanta magaalada Dhuusamareeb ku yeeshaan xubnaha baarlamaanka Galmudug oo uu shir guddoominayay guddoomiye Maxamed Nuur Gacal ayaa waxaa soo xaadirtay 68 Xildhibaan, waxayna dhamaantood u codeeyeen in Guriceel ay noqoto degmo buuxda oo ka tirsan degmooyinka gobolka Galgaduud.
