Hab-dhowraha Baralamanka Soomaaliya Xildhibaan Maxamed Cumar Maxamuud oo Xilli Walba Radio Muqdisho la soo Socodsiiya Kulanka Xildhibaanada Golaha Shacabka ayaa saakay inoo sheegay in Xubnaha Golaha Shacabka ay ka doodi doonaan Ajandayaasha kala ah Hindise Sharciyeedka Isgaarsiinta oo horay loo soo diyaariyay isla markaana uu ka Hor Akhrin doono Baarlamaanka Guddoomiyaha Guddiga Warfaafinta iyo Akhrinta koowaad ee Hindise Sharciyeed ku saabsan Dhaqidda lacagta.
Xildhibaanka ayaa ka jawaabay su’aal ku saab sanayd in xubnaha Golaha Hindise sharciyeedyadaan ay dood galin doonaan wuxuuna yiri.
“ Markuu Aqriyo Guddoomiyaha Guddiga Warfaafinta Xildhibaan Cabdi Xaashi Cabdullaahi Hindise Sharciyeedkaan Isgaarsiinta kaddib xildhibaanadu fikirkooda ayay ku biirin doonaan iyaga oo su’aalo ka weydiin doona Guddoomiyaha Guddiga isla markaana talo soo jeedin doona si loomeel mariyo Hindisahaan sharciga loogu samaynayo Isgaarsiinta dalka”
Dhanka kale Xildhibaan Maxamed Cumar Maxamuud ayaa sheegay in Hindisaha kale ee Dhaqidda lacagta ay tahay mid dib u Eegis loogu Samaynayo la cagaha Doolarka ah ee daawada leh isla markaana la dhaqo taas oo ay ka hadli doonaan Golaha Baarlamaanka inay Arrintaas tahay sharci iyo inaysan ahayn, iyadoo waqtigaas kaddib qodobkaas loo samayn Doono sharci Kulamada kale ee Baarlamaanka, isagoo intaa raaciyay in Xildhibaanadu ay sugayaan inuu horyimaado Mas’uul ka tirsan Wasaaradda Maaliyadda.
Ugu dambay Xildhibaanka ayaa ka hadlay qorshaha lagu dhimayo Mushaaradka Dowladda taas oo ay horay u shaacisay Wasaaradda Maaliyadda ,isagoo sheegay in qodobkaas loo soo gudbin wali Mudanayaasha Golaha shacabka.
