Barlamaanka Federalka ah ee Soomaaliya oo maanta kulan ku leh Xarunta Golaha shacabka ayaa uga hadli doona sharciga “Leylitirka” , iyadoo dhanka kale warbixin ka dhageysanaya guddiga arrimaha dibadda ee baarlamaanka.
Xildhibaan Maxamed Cumar Maxamuud habdhowraha baarlamaanka Federaalka ah ee Soomaaliya oo la hadlay Radio Muqdisho ayaa sheegay in shirka baarlamaanka ay horyaalaan labo ajande oo kala ah Akhrinta labaad ee Hindise sharciyeed ku saabsan xuquuqda leylitirka iyo deeqaha ay leeyihiin siyaasiyiinta dalka.
“Sharciga leylitirka waxa ay tahay waa lacag dhigaal ah oo la siinayo siyaasiyiinta kaasi oo ay soo diyaariyeen Guddiga xeer hoosaadka baarlamaanka, tusaale Xildhibaankii ama mas’uulkii kale ee hadda xil ka haya dowladda ee aan soo gelin saaxadda siyaasadda ee sanadkan aynu jirno, ayaa helaya lacag dhigaal ah oo inta ay noqon doonto ay Xildhibaanada isku raaci doonaan” ayuu yiri Xildhibaan Maxamed.
Xildhibaan Maxamed Cumar Maxamuud ayaa tilmaamay in Guddoomiyaha baarlamaanka Mudane Maxamed Sheekh Cismaan Jawaari u hadal jeedin sameyn doonto shirka baarlamaanka ee maanta oo ku saabsan qorshaha horyaalla golaha.
