Mudaneyaasha Baarlamaanka ayaa maanta kulan ku leh magaalada Muqdisho ayadoo lagu wado in xildhibaanada uu hor-tago R/wasaaraha xukuumadda Soomaaliya mudane Cumar Cabdirashiid Cali Sharma’arke.
Ciidamada ammaannka ayaa ku sugan waddooyinka ku dhow xarunta golaha shacabka ayadoo xildhibaanada iyo shaqaalaha baarlamaanku ay galayaan xarunta golaha shacabka ee uu shirku ka dhici doono.
Guddoomiyaha baarlamaanka ayaa horay u shaaciyay in goluhu uu maanta uu sabti ah uu yeelan doono kulan ku saabsan in xukuumadda ay cod u qaadaan.
Xildhibaan Maxamed Cumar oo ka tirsan Barlamaanka Soomaaliya ayaa Radio Muqdisho u sheegay in kulanka Barlamaanka uu jiro, balse Ra’iisul wasaaraha uu imaan doono golaha si uu u sheego isbadel ku yimid golaha wasiirrada cusub ee uu dhawaan soo magcaabay, iyadoo ay soo baxayaan warar sheegaya in Ra’iisul wasaare Cumar Cabdirashiid Cali uu ka laabtay golahiisa wasiirrada uu soo magcaabay.
“Kulanka waxaa laga filan karaa in baarlamaanka uu go’aan ka gaaro arrinta golaha Wasiirada cusub, inkasta oo ay jiraan isbadalo ku yimid golaha Wasiirada oo aan si rasmi ah weli noo soo gaarin, balse Ra’iisul wasaaraha ayaa laga warsugayaa in uu baarlamaanka la hadlo, una sharxo qorshe howleedkiisa iyo haddii ay jiraan isbadal kale” ayuu yiri Xildhibaan Maxamed Cumar.
Warar aan ka helnay xafiiska R/wasaaraha ayaa sheegay in mudane Cumar Cabdirashiid uu khudbad u jeedin doono baarlamaanka.
Wixii warar ah ee ku soo kordha waan idin la soo socodsiin doonnaa hadduu Alle idmo.
