Guddoomiye ku-xigeenka guddiga arrimaha gudaha iyo amniga ee baarlamaanka Xildhibaan Daahir Amiin Jeesow ayaa mudenayaasha baarlamaanka ka hor akhriyay warbixinta ku saabsan hindise sharciyeedka Guddiga xuduudaha iyo Federaalka, kaasi oo ay mudanayaashu ay u ahayd akhrintii labaad, balse maanta la soo gabo gabeeyay akhrintiisa saddexaad, isagoo codsaday in hindise sharciyeedka la meel mariyo marka ay soo akhristaan si loo heli dowlad goboleedyo aan KMG ahayn.
Soo jeedinta warbixinta guddiga xuduudaha iyo federaalka ayaa mudanayaashii ka hadlay waxa ay soo jeediyeen talooyin dhowr ah oo ay sheegeen in ay u baahantahay in lagu darro, si looga fogaado in uu saameyn ku yeesho nidaamka hirgelinta Federaalka.
Dhanka kale mudanayaasha Baarlamaanka ayaa maanta gudo galay akhritan koowaad ee Hindise sharciyeedka Iibka Qaranka, kaasi oo Baarlamaanka ay u soo gudbisay Wasaaradda Maaliyadda Qaranka.
Siihayaha Wasiir ku-xigeenka Wasaaradda Maaliyadda Cabdullaahi Maxamed Nuur ayaa mudanayaasha baarlamaanka ka hor akhriyay muhiimadda uu hindise sharciyeedkan u leeyahay maalgeshiga dalka, isagoo ka codsaday in mudanayaasha Baarlamaanka ay soo akhristaan oo ilgaar ah ku eegaan meel marinta hindise sharciyeedkan.
Guddoomiyaha Baarlamaanka Federaalka ah ee Soomaaliya mudane Maxamed Sheekh Cismaan Jawaari oo gabo gabadii kulanka ka hadlay ayaa tilmaamay in maalinta Sabtida ay Xildhibaanada cod gelin doonaan Hindise sharciyeedka Guddiga Xuduudaha iyo Federaalka.
“Maalinta Sabtida ah waa codeyn, marka codka la bixinayo Xildhibaanku codkiisa waxa qiimo weyn u yahay shacabka Soomaaliyeed, codka Halkii Xildhibaan waxa uu u dhigmaa 50-kun oo Soomaali ah, maalinta Axadda ah haloo yeero Wasiirka Amniga Qaranka iyo Agaasimaha hay’adda NISA” ayuu yiri prof Jawaari.
