Mudanayaasha Baarlamaanka Soomaaliya ayaa maanta su’aallo weydiiyay xeer ilaaliyaha guud iyo Hanti dhowrka Qaranka, kaddib markii looga yeeray kulankii baarlamaanka ee maanta.
Su’aalaha iyo doodda Baarlamaanka ee maanta ayaa waxa ay ku qotomeen sharci ahaanshiyaha qoraal dhawaan si wada jir ah uga soo baxay xafiisyada xeer ilaaliyaha guud iyo Hanti dhawrka Qaranka oo ka hor imaanayo qodobo ku qoran dastuurka dalka, waxaana Xildhibaannadu ay ka dalbadeen in ay raali gelin ka bixiyaan qoraalka ay soo saareen.
Xeer ilaaliyaha guud ee Qaranka Axmed Cali Daahir oo Xildhibaannada uga jawaabayay su’aalo weydiinta ayaa Baarlamaanka ka hor sheegay in ay jiraan baaritaanno ay sameeyeen lagu ogaaday in hay’ado badan ay sameeyeen musuq maasuq, dhawaana la horgeyn doono maxkamadda.
Hanti dhowrka guud ee Qaranka Dr Nuur Faarax oo isna Baarlamaanka ka hor hadlay ayaa sheegay in xafiiska hanti dhowrka guud uu ka madax banaanyahay dhinacyada siyaasadaha ee dalka, isagoo taa caddeyntooda u soo qaatay miisaaniyadda uu xafiiska ku shaqeynayo oo aad loo yareeyay.
