Ciidanka xoogga dalka iyo daraawiishta Jubbaland ayaa Khawaarijta ku laayey dagaal ka dhacay degaanka Baarsanguuni ee gobolka Jubbada Hoose.
Taliyaha Dawaariishta Jubbaland Jeneraal Ismaaciil Saxardiid oo Warbaahinta la hadlay ayaa sheegay in jab xoogan loo geystay khawaarijta oo isku dayay weerar gaadmo ah oo ay ku soo qaadeen fariinka ciidanka ee deegaanka Baarsanguuni ee gobolka Jubbada Hoose,
“Waxaan shacabka u xaqiijinayaa in qasaare xoogan lagu gaarsiiyay weerarkii saaka ay maleeshiyada soo qaaday, waxaana madaxda sare ee dowladda Federaalka iyo Jubbaland ka codsaneynaa in la dalacsiiyo ciidamada ku guuleystay inay jilbaha u aasaan dhagarta khawaarjita”.ayuu yiri Jeneraal Ismaaciil Saxardiid
Taliyaha Guutada 11-aad, qeybta 43-aad ee ciidanka Xoogga dalka Gaashaanle Sare Maxamed Cabdi ayaa xusay in ciidamada ay gacanta ku hayaan shan maxbuus oo ka tirsan khawaarijta duulaanka soo qaaday, isagoo intaa ku daray “27 Khawaarij ah ayaan ku dilnay Baarsanguuni, 5 maxaabiis ah ayaan gacanta ku dhignay, ciidanka maanta howlgalkaan fuliyey waxaan codsaneynaa in la dalacsiiyo,”
Taliyaha Ciidanka dhulka Xoogga dalka Soomaaliyeed Jeneraal Dayax Cabdi Cabdulle oo faah faahin ka bixiyey khasaaraha khaawarijta lagu gaar siiyey saaka deegaanka Baar-sanguuni ee gobolka Jubbada hoose ayaa tilmaamay in ciidamada wadajirka ah ay ku guuleysteen inay jebiyaan duulaanka ay ku soo qaadeen fariisamaha ciidanka, isagoo ciidamada ku bogaadiyay inay dardargeliyaan howlgallada ka dhanka ah khawaarijta.
