Dood wadaagan ku saabsanaa badbaadada saxafiga oo ay si wada jir ah u soo qaban qaabiyeen Relief International iyo Internews oo ay ka qeyb galeen Guddoomiyaha Guddoomiyaha Gudiga Warfaafinta, Agaasimaha Guud ee Wasaaradda Amniga Gudaha, Agaasimaha Warbaahinta Qaranka, Guddoomiye ku-xigeenka siyaasadda ee Gobolka Benaadir, Qaar ka mid ah madaxda Warbaahinta madaxa Banaan, rugcaddeyaal saxaafadeed iyo marti sharaf kale ayaa maanta lagu qabta Muqdisho.
Madaxa mashaariicda dhanka saxaafadda u qaabilsan Hay’adda Relief International Axmed Cawil Maxamuud oo hadal ka jeediyay dood wadaaga ayaa sheegay inay tahay markii labaad oo ay qabtaan, isagoo xusay in u jeedku yahay sidii loo heli lahaa badqabka suxufiga.
Agaasimaha Warbaahinta Qaranka Mudane Cabdiraxmaan Yuusuf Sheekh Al-Cadaala ayaa sheegay in badqabka saxafiga lagu heli karo in suxufiyiintu ay ka shaqeeyaan nabadgelyada guud ee dalka oo ay warka ka eegaan dhanka wanaaga ah.
Maxamed Aadan Guuleed “Caano geel” guddoomiye ku-xigeenka siyaasadda ee Gobolka Banaadir ayaa sheegay in madax banaanida saxaafaddu ay tahay inay la timaado afkaaro nabadeed, isla markaana ay fahmaan waaqaca lagu jiro.
Agaasimaha guud ee Wasaaradda Amniga gudaha ee xukuumadda Soomaaliya mudane Maxamed Cali Jaamac ayaa bahda saxaafadda ka codsaday in laga wada shaqeeyo amniga guud ee dalka, si looga hortago dadka dhibaateynaya suxufiyiinta.
Ugu dambeyntii Guddoomiyaha Guddiga Warfaafinta iyo dhaqanka ee baarlamaanka Mudane Cabdi Xaashi Cabdullaahi ayaa ugu baaqay warfidiyeenada inay warka ka eegaan dhanka wanaaga ah oo ay u hiilaan waxkasta oo difaacaya xaquuqda dadka laga gardaranyahay.
Gebo gabadii Dood wadaaga ayaa la isku raacay in waxkasta laga fiiriyo dhanka wanaaga, warkana laga eego dhinacyo badan oo ay ugu horeyso in laga ilaaliyo waxkasta oo saxafiga dhib ukeenaya, bulshada ku abuureysa dhibaato horleh.
SAWIR QAADE: C/adar Catoosh
