Shirkan oo uu soo qaban qaabiyay Bangiga Aduunka ayaa waxaa looga hadlayay horumarka dhanka dhaqaalaha oo ay soomaaliya sameeysay 20-kii sano ee la soo dhaafay.
Shirkan ayaa waxaa ka soo qeyb galay wasiirro hore,danjiraha dowlada Soomaaliya u fadhiya dalkani Kenya ganacsato isugu jiro Soomaali iyo Keenyaan,qaar kamid ah bangiyada ka shaqeeya Kenya iyo Mas’uuliyiin ka tirsan hay’adda lacagta aduunka ee IMF.
Mas’uuliyiin ka tirsan Bangiga aduunka ayaa ka warbixiyay halka uu marayo dhaqaalaha soomaaliya,iyagoo sheegay in dhaqaalaha Soomaaliya ay kor qaadeen xawaaladaha,isgaarsiinta iyo ganacsiyada sida gaarka ah loo leeyahay.
Danjiraha dowlada Somaaliya u fadhiya dalkani Kenya Jamaal Maxamed Xasan oo warbaahinta la hadlay kadib markii uu dhamaaday Shirka ayaa ugu baaqay ganacsatada soomaaliyeed in ay dalkooda maal gashtaan,isagoo tilmaamay in la gaaray waqtigii ay dalkooda maalgashan lahaayeen.
Danjire Jamaal ayaa sheegay in Soomaaliya ay ka soo kabsaneyso dhibaatooyinkii soo gaaray 20-kii sano ee la soo dhaafay,islamarkaana uu koboc sameynayo dhaqaalaha dalkeenaa,isagoo sheegay in loo baahanyahay in laga faa’ideyso kheyraadka ka buuxo dhulkeena.
Danjire Jamaal ayaa intaasi ku daray in xawaaladaha soomaalida ay kor u qaadeen dhaqaalaha dalkeena,isagoo sheegay in warbixinta uu soo bandhigay Bangiga aduunka lagu sheegay in ku dhawaad %40 ay xawaaladuhu gacan ka geystaan koboco dhaqaalaha dalkeena.
Waa markii ugu horeysay oo uu Bangiga aduunka ku dhawaaqo in dhaqaalaha dalkeena uu koboc sameeyay 20-kii sano ee la dhaafay oo ay dalka ka jireen dagaalo sukeeyo.
Sawir qaade:- Xasan Cumar Baffo
