Qaxootiga Rohingya ee ku nool xerooyin ciriiri iyo buuq badan waa in xukuumadda dalka Bangladesh ay u sameysaa dib u dejin,isla markaana ay geysaa goobo haboon sidaasi waxaa lagu qoray warbixin ay maanta soo saartay hey’adda xuquuqul insaanka ee Human Rights Watch (HRW)
Warbixin ka koobneyd 68-page oo laga soo saaray xarunta ururkaasi ee magaalada Nerw York ayaa lagu sheegay in qaxootiga Rohingya oo sugaya in dib loogu celiyo dalkooda ay soo foodsaarayaan halis iyo dhibaatooyin kale ,gaaar ahaan xilligga roobabka Mansoomka ku soo fool-leh oo laga cabsi qabo in ay ku fatahaan daadad iyo sidoo kale in ay halkaasi ka dhashaan cudurada faafa.
Warbixinta hey’adda xuquuqul insaanka ee Human Rights Watch (HRW) ,ayaa loogu baaqay mas’uuliyiinta xukuumadda dalka Bangaladesh in ay dadka qaxootiga ah u raraan goobo aan buuq laheyn oo nabdoon,waxaana qoraalkaasi lagu caddeeyey in dadkasi ay u baahan yihiin qalab,dhar iyo waxbarasho.
Bishii Agoosto ee sanadkii hore dad gaaraya Todobo Boqol oo Kun oo Rohingya ah ayaa ka soo cararay gobolka Rakhine ,kadib kolkii ciidamada dalka Myanmar ay ku qaadeen dagaal ama weerar bahalnimo ah oo loo geystay dadka muslimiinta ah ee laga tiro badan yahay.
Xilligaan xerada Kutapalong-Balukhali waxaa ku nool dad gaaraya 626,000 Rohingya ,taasoo ka dhigan in xeradaasi ay tahay mid ka mid ah kuwa ugu weyn dunida.
